Read zande Gate 7 Bible Online

Gate 7 - zande bible

Gate 7

¹Yekova ki ya fu Mose, “Mo bí, mi sa ro wa Mbori fu Faro. Arona nga unvuruamo nikangia ga nebi.

²Mo ki gumba agu apai dunduko mi ka ruga ro na ni; Arona nga unvuruamo nikagumba pai fu Faro, ya ko kúsi awiri aYisaraere rogo gako ringara.

³Ono mi anyákasa kpoto Faro yo, ki ngeesi gimi yuguyuguapai, na gimi iiriwo yuguyuguapai rogo ringara Ezipeta,

⁴ono Faro adéga nga tuko sa sangbaro te; mi atáã bere ku ri Ezipeta, ki kusi gimi arimbasa aborovura nga awiri aYisaraere nga gimi aboro rogo gu ringara nga Ezipeta ni babakere mbusa.

⁵AEzipeto ki ini he ya mi nga Yekova, ho mi ka táã bere ni ku ri Ezipeta, ka kusa awiri aYisaraere dagba yo.”

⁶AMose na Arona ki mangi kina wo; a wa Yekova arugu yo, i amangi kina wo.

⁷Garã Mose adu 80, na ga Arona 83, ho i agumba pai ni fu Faro.

⁸Yekova ki ya fu aMose na Arona,

⁹“Ho Faro ka ya ni fu roni, ‘Oni yúgu gaoni iiriwopai,’ mo ki ya fu Arona, ‘Mo di ga ngbondo, ki ba ha ku sande ku bara bangiri Faro, si sá tihe ni wo.’ ”

¹⁰AMose ki ndu na Arona koyo du Faro ni, ki mangi a wa Yekova arugu yo na ni; Arona ki ba gako ngbondo ku sande ku bara bangiri Faro na ku bara bangiri avuruko, si ki sa tihe ni wo.

¹¹Faro ki yambu airatatamana na airasoroka; abinza nga ga Ezipeta yo ki mangi he a wo ni gayo birĩ.

¹²Bambiko i abafu gayo angbondo ku sande ni ba sa sa, si ki sa ti he ni awo, ono ga Arona ngbondo ki mbiri gayo angbondo.

¹³Ono kpoto Faro yo ki ninyaki kindi ka ko adega nga tuko sa sangbayo ya; a wa Yekova agumba ha.

¹⁴Yekova ki ya fu Mose, “Kpoto Faro yo nanyaka anyaka ni rengo, ko naka pa nduge fu aboro.

¹⁵Mo ndú koyo du Faro ni wiso ho ko nikandu ni ku di yo. Mo ki ru pavuru di ka ngbisa ko, gu ngbondo nasa tihe ni wo mo ki di he ku bero.

¹⁶Mo ki ya fu ko, ‘Yekova, gu Mbori nga ga aEbere ko, ko kedi re kono du mo ni, niya, “Mo ídi he fu gimi aboro i ndu ka manga pare ngbakungba yo. Mo bí nga, mo agia nga sangba daku awere a te.”

¹⁷Ya Yekova wẽ, “Be gere mo ka ina gu pai ti ni nga, Mi nga Yekova: mo ngére, mi anára ime Nire yo na gu ngbondo du be re, si ki sa tihe ni kure.

¹⁸Agu atĩo du Nire yo ami akpíka akpika, Nire ki fũ afũ gbada, si nikagberã ti aEzipeto ka mbira ime Nire.” ’ ”

¹⁹Yekova ki ya fu Mose, “Mo yá fu Arona, ‘Mo di ga ngbondo ki taĩ bero ku ri agu aime nga ga Ezipeta, ku ri gayo adi, na gayo wiri adi, na gayo abarugudi, na gayo amunga, ya si sá tihe ni kure. Kure ayé ku rogo gu ringara dunduko nga Ezipeta, ku rogo agu aũtudaime nga ga ngua, na gu nga ga mbia.’ ”

²⁰AMose na Arona ki mangi a wa Yekova arugu yo na ni; ko ki tumba ngbondo, ki nari gu ime nga Nire, ku bangiri Faro na ku bangiri avuruko, gu ime dunduko nga ga Nire si ki sa tihe ni kure.

²¹Agu atĩo nadu Nire yo, ami ki kpiki akpika dunduko. Ime Nire ki fu afu gbada, ka aEzipeto arengba nga na mbira gu ime nga Nire ya; kure adu rogo ringara Ezipeta dunduko.

²²Ono abinza nga ga Ezipeta yo ki mangi a wo ni gayo birĩ; si du kpoto Faro yo ki ninyaki kindi ka ko adega nga tuko sa sangbayo ya, a wa Yekova agumba ha.

²³Faro ki karaga tiko ki rimi ku rogo gako bambu yo, ka ko aruga nga tiko na gi pai re kpotoko yo a ya.

²⁴AEzipeto ki geteke rago pangba Nire dunduko tipa ime ka mbira ha, bambiko i arengba nga na mbira ime Nire te.

²⁵Rame anyasi saba fuo ta Yekova Nire.