Read zande Gate 9 Bible Online

Gate 9 - zande bible

Gate 9

¹Yekova ki ya fu Mose, “Mo ndú koyo du Faro ni, ki ya fu ko, ‘Ya Yekova nga ga aEbere Mbori wẽ, “Mo ídi fu gimi aboro i ndú ka manga pare.

²Ka mo ká pa nduge fu yo, ki ka kuti yo kindi,

³mo ngére, be Yekova adú ri gamo zogozogo anya du banambu yo, na ku ri afarasi, na adongi, na akameri, na rimbasa anya nga abagara, na akandoro, gbegberẽ kaza anya azía ra.

⁴Ono Yekova akpáraka dagba gu zogozogo anya nga ga aYisaraere ra na gu zogozogo anya nga ga aEzipeto ra, ka nya akpi nga sa dagba ga awiri aYisaraere ra ya.” ’ ”

⁵Yekova ki ringbisi ragoho, ki ya, “Gba, Yekova ka manga gi pai re rogo ringara no.”

⁶Gba Yekova ki mangi gi pai re; ga aEzipeto zogozogo anya ki kpiki dunduko, ono a nga ga awiri aYisaraere zogozogo anya akpi nga sa te.

⁷Faro akedi sunge, oni ngére, a nga ga aYisaraere zogozogo ru ho sa akpi te. Ono kpoto Faro yo anyaki anyaka, ka ko aida nga aboro ndu ya.

⁸Yekova ki ya fu aMose na Arona, “Oni ndúku kuku gbigiwi ni beroni, Mose ki mi he ku ngbangbaturũ yo ku bangiri Faro.

⁹Si asá tihe ni turubu misimisi ku ri ringara Ezipeta dunduko, si akúsa anzia na amuku ti kpoto aboro na ti anya, rogo ringara Ezipeta dunduko.”

¹⁰I ki nduku kuku gbigiwi, ki ru ku bara bangiri Faro, Mose ki mi he ku ngbangbaturũ yo, si ki sa tihe ni anzia na amuku ti kpoto aboro na ti anya.

¹¹Ka abinza arengba nga na ru bara bangiri Mose bambiko anzia ya, bambiko anzia adu ti abinza, na ti aEzipeto dunduko.

¹²Ono Yekova ki nyakasi kpoto Faro yo anyakasa kindi, ka ko adega nga tuko sa sangbayo ya; a wa Yekova agumba ha fu Mose.

¹³Yekova ki ya fu Mose, “Mo gúari ngbatutu wiso, ki ru bara bangiri Faro, ki ya fu ko, ‘Ya Yekova nga ga aEbere Mbori wẽ, “Mo ídi fu gimi aboro i ndu ka manga pare.

¹⁴Bambiko ti gi rago re mi akéda gi gberãngbi dunduko ku kpotoro yo, na ku ri gamo amoyambu, na ku ri gamo aboro, ya mo ini he nga a nga kura boro ho wa mi rogo zegino dunduko te.

¹⁵Bambiko wa mi arengbe ka taã bere ki mangi ro na gamo aboro na tata kaza, ka i adi ro ku sa yo ri kpotosende;

¹⁶ono tipa kina gi pai re mi aidi he ti ni mo nye ni ungaro, nga ka yugo pa gi tandu, i ki taki pande pa rimore rogo kpotosende yo dunduko.

¹⁷Mo natumba tiro kindi kuti gimi aboro ki ka pa nduge fu yo.

¹⁸Mo ngére, gba ti kina gi rago re, mi akéda mai si aná na kina kere morogumba, nga gu adu nga mbata Ezipeta yo fuo enga ha daku awere ya.

¹⁹Were mo kédi pai awere, i rimisi gamo anya na agu ahe dunduko du be ro ringara yo ku rogo bagbuko yo; bambiko morogumba azórã ku ri agu aboro ka du ati yo na ku ri zogozogo anya dunduko ata yega nga ku kporo no ya, i ki kpiki akpika.” ’ ”

²⁰Gu ni nanigunde ti sangba Yekova dagba ga Faro amoyambu yo, ni ki nisosodi gani akanga i óro ku dimo yo na gani zogozogo anya;

²¹ono gu ni nagunde nga ti sangba Yekova ya, ni ambu gani akanga kina ringara yo na gani zogozogo anya.

²²Yekova ki ya fu Mose, “Mo táĩ bero ku ngbangbaturũ yo, ya morogumba na ku ri Ezipeta dunduko, ku ri aboro, na ku ri anya, na ku ri rũkurũku ahe ati yo, ku rogo ringara Ezipeta yo dunduko.”

²³Mose ki taĩ gako ngbondo ku ngbangbaturũ yo; Yekova ki kedi gumba na morogumba, we ki yara ku sende no. Yekova ki kedi morogumba si na ku ri ringara Ezipeta.

²⁴Were morogumba adu na ikpira gumba ni vunduvundu he, ni kere he gbe, nga gu naadu nga mbata rogo ringara Ezipeta dunduko ho rikaaboro aenge ni yo ya.

²⁵Morogumba ki gbarasi ringara Ezipeta na agu ahe nadu ati yo dunduko, aboro na anya a; morogumba ki gbarasi rũkurũku ahe ati yo dunduko, ki kuadi angua ati yo dunduko.

²⁶Kina rogo ringara Gosene, yo awiri aYisaraere adu ni, morogumba adu nga ni ya.

²⁷Faro ki kedi sunge, ki yambu aMose na Arona, ki ya fu yo, “Awere mi ingi pai ti gi rago re; Yekova du na rurupai, ono ani na gimi aboro ru nga gaani apai te.

²⁸Mo zúngadi Yekova; bambiko gi kere gumba re na morogumba susi ni rengo; mi ki idi he fu roni oni ndú, oni anyé nga kono kindi te.”

²⁹Mose ki ya fu ko, “Awere wa mi nikakura ku zegi yo bakporo no, mi atáã bere koyo du Yekova ni; gumba ago ago, ka morogumba adú nga berewe a ya, mo ini he ya kpotosende nga ga Yekova.

³⁰Ono tipa ro na gamo amoyambu, mi ini he ya, oni agúnde nga ti Yekova nga Mbori awere te.”

³¹Nzibi na he wa mapunga dunduko ki du ni gbarasigbarasi he, bambiko regbo zara he wa mapunga nadu, mbumbuda nzibi aima kura a.

³²Ono nganu na kpepasio agberã nga te, mbiko si adu ni kusa ha.

³³Si du Mose ki guari pati Faro bakporo yo, ki taĩ abeko ku ari fu Yekova; sumba gumba ki go na morogumba, ka mai ana nga ku ri kpotosende a ya.

³⁴Ho Faro abi he ni ya mai na morogumba si go na sumba gumba a, ko ki ingi pai berewe, ki nyakasi kpotoko yo, ko na gako amoyambu.

³⁵Si du kpoto Faro yo anyaki anyaka gbe, ka ko aida nga fu awiri aYisaraere i ndu ya; a wa Yekova agumba ha ku ngba Mose.