Read zande Eyobo 1 Bible Online

Eyobo 1 - zande bible

Eyobo 1

¹Kumba adu ringara Uza yo, rimoko angia Eyobo. Gu kumba re adu ni ziazia ko ni ruru ko a, nga gu ko nagunde ti Mbori ki nine gbigbitapai.

²Ko ki batika awiriko saba nga akumba na ade biata.

³Ko adu na akandoro be ko wa 7,000 na akameri wa 3,000, na abaabagara vodi yo ra ni ba ue ue, du wa 500, na anaadongi 500, na badungu aborokporo. Si du gi kumba re adu ni bakere boro dagba agu aboro naadu ku uroyo.

⁴Awiriko anandu ka manga pumbo kpuyo yo ti gayo uru ni ba sa sa. I ki nikedi sunge fuo agu adawiriyo nadu biata re i ye i ri he na yo ki mbiri he.

⁵Wo si adu, ho rago gayo pumbo asusi ni, I yobo ki yambu yo ka kpara yo ziazia. Ko nnaguari ngbatutu wiso ka fu zozo motumo npa yo wa du yo dunduko ni ba sa sa; bambiko Eyobo aya, “Isoke, awire nga akumba mangi ingapai ki gumba gbegberẽpai ku kpotoyo yo fu Mbori.” Were Eyobo anamanga kindi.

⁶Ni gu uru ho awiri Mbori aye ni ku bara bangiri Yekova, Satana ki ye a tigako ku dagba yo.

⁷Yekova ki ya fu Satana, “Wari mo aye ni?” Satana ki karaga ha fu Yekova ki ya, “Mi nata ata koyo na kono auru kpotosende, nindu ku bani na ku bani.”

⁸Yekova ki ya fu Satana, “Mo berẽ pa gi moyambu nga Eyobo? bambiko a nga boro ho du wa ko auru kpotosende yo te, nga ziazia kumba ni ruru ko, nga gu ko nagunde ti Mbori, ki nine gbigbitapai.”

⁹Satana ki karaga ha fu Yekova ki ya, “Eyobo nagunde ti Mbori gbua?

¹⁰A nga kina ro naadua gbata pati ko kirikiri na gako kporo, na pati gako ahe dunduko, te? Mo nafu maku ku ri aũbeko si du moi gako ahe pai ti ni zegino.

¹¹Mo taĩ nga bero awere, ki zadi nga agu ahe du be ko dunduko, ko agberã ngbako yo foro kina ku bangiro.”

¹²Yekova ki ya fu Satana wẽ, “Mo ngere, agu ahe dunduko du be ko si kina tii be ro; ono ka mo moi nga bero ti kpotoko ya.” Si du Satana ki guari bara bangiri Yekova.

¹³Ni gu uru ho awiri Eyobo nga akumba na ade asungu ni ku unvuruayo yo ka ri he nimbiri he,

¹⁴sunge ki da koyo du Eyobo ni, ki ya, “Abaabagara nasopa bino, anaadongi ki du pati ra niriki.

¹⁵ASaba ki ti ku ri ra ki rogo ra ki merẽ na ami. I imi amoyambu ni basape; kina re sa nimerẽ ka ye ka gumba ha foro.”

¹⁶Si kina ku ngbako, kura ni ki da, ki ya, “Ga Mbori we niti ngbangbaturũ yo, ki zo akandoro na amoyambu; kina re sa nibati ka ye ka gumba ha foro.”

¹⁷Si kina ku ngbako, kura ni ki da, ki ya, “AKasado da na rika vura biata ki ti ku ri akameri, ki rogo ra ki merẽ na ami. I ki imi amoyambu ni basape; kina re sa nimerẽ ka ye ka gumba ha foro.”

¹⁸Si kina ku ngbako, kura ni ki da, ki ya, “Awiro nga akumba na agu yo nga ade nari he nimbiri he ku unvuruayo yo;

¹⁹mo ngere, bayuge ki ye ngbakungba yo, ki kiti atukpu bambu biama, si ki ti ku ri gu paranga aboro re ki imi yo dunduko; kina re sa nimerẽ ka ye ka gumba ha foro.”

²⁰Si du Eyobo aguari ti ni, ki siri gako roko, ki kpe riko, ki ti sande, ki irisi Mbori.

²¹Ko ki ya, “Mi akuru rukumbu nina yo ni kina kundiri re, mi agá ni kundiri re a wo. Yekova nafu he, Yekova rogo ho. I tambua rimo Yekova.”

²²Rogo agi apai re dunduko Eyobo amanga nga ingapai te, ko agumba nga gbegberẽpai kuti Mbori a te.