Read zande Eyobo 10 Bible Online

Eyobo 10 - zande bible

Eyobo 10

¹“Torore nambu be agu apai namanga ungare. Mi akpára pa gi baka bangirise akpara zaza. Mi afu rogo gu nirãnirãpai du torore yo.

²Mi ayá fu Mbori, Ka mo sári nga ngbanga kuti re ya; mo gúmba gu pai fere mo adarã pai ti ni kuti re.

³Wenepai nga ha bangiro nga ka rungosi boro, ka gindiga gu sunge mo amangi ni bero, ka ida pa ga gbegbere aboro tabura?

⁴Bangirise ti ro wa ga boro? Mo nabi he wa boro nabi he?

⁵Gamo arame wa ga boro arame? watadu garãro wa garã boro,

⁶mo nagbata gi irairaapai ti ni, ki ningere tipa gi ingapai,

⁷wa mo avura ina ha ya gbegbere boro nga mi te, a nga boro ho ka batasi re be ro a te?

⁸Bero naamangi re ki mbakadi re mi du wa sa dunduko; awere kina ro nagbarasa re.

⁹Mo tíngidi he, ya mo ambakadi re wa kina pere; mo asá re ku nvutu yo berewe?

¹⁰Mo auka nga re wa mamunya ki kputasi re wa i nikputasi mamunya, te?

¹¹Mo aukadi re na kpoto na pasio, ki zungu re na meme na agbaga.

¹²Mo naafu unga fere na weneringise, ga bandahe abanda torore.

¹³Ono mo aoko agi apai re kina ku kpotoro yo; mi ini he ya gere nga gu pai mo aberẽ pa ha.

¹⁴Ka mi mangi ingapai, mo nabi re abi, ka mo asara nga ngbanga fere tipa gi irairapai ya.

¹⁵Ka mi du ni gbegberẽ boro, rungo du fere! Ka mi du ni ruru boro, mi arengba nga ka tumba rire ku ari te; bambiko mi hi be pa zee, ki ningere kuti gi gberãngbi.

¹⁶Ka mi tumba tire ku ari, mo nagbata re wa bahu, ki nimangi iiriwoapai kuti re.

¹⁷Mo kusi gamo adezire kuti re berewe, ki nikiisi ga imisiri ngbaduse kuti re, satise na vura du kuti re.

¹⁸“Tipagine tie mo akusi re ti ni rukumbu yo? Ako, ka mi akpi mbata bangirise nikabi re,

¹⁹ka mi adu wa mi adu nga te, ka i atindi re rukumbu yo ku murã yo.

²⁰Gimi arame aumba nga te? Mo hé nga re ke, mo mbú nga re ni sa re, mi wasa nga toni,

²¹mbata mi nikandu ku ho mi ka yega nga ni ya, zavura ku rogo ringara bitimo na kirima kpio,

²²ringara nduunduu bitimo, ringara kirima kpio, zanga rugapai yo, yo du imarago ni wa kina bitimo.”