Read zande Eyobo 11 Bible Online

Eyobo 11 - zande bible

Eyobo 11

¹Sofara boro Nama ki karaga pai, ki ya:

²“Dungu apai wa gure ka boro akaraga nga pai sa ni ya, na boro na dungu fura ngbani were ka i di pai rini?

³Ka ga fugo enda za aboro i ongo? ho mo ka moma pai ni, a nga boro ho nikafu zee foro te?

⁴Bambiko ya mo, ‘Gi yugopai du nzunzu, mi bangiri Mbori gigiri.’

⁵Ako, ka kina Mbori fura, ki za ngbako ka gumba pai,

⁶ko ki yugu gu okooko apai nga ga tatamana foro! Bambiko nge gako rugatinapai ange ni rengo. Si du mo íni he nga Mbori naumbasi gu pai rengbe foro mbiko ga irairapai.

⁷“Mo rengbe na ruga tiro na ga Mbori nyanyaki berá? Mo rengbe na ina pa gu Ko nzunzu du na tandu apai du?

⁸Turũ he aturã ki susi ngbangbaturũ―gini pai rengbe mo ka manga ha? Si ni dudungura ha ki susi Baatoro kpikpi aboro―gini pai rengbe mo ka ina ha?

⁹Ringbisiringbisi bagiza ha si susi kpotosende, patihe ki kii susi baime.

¹⁰Ka ko susi rogo, ki kisi he, ki yambu boro sa sarangbanga, da tie rengbe ka za ko?

¹¹Bambiko ko ini agu yo nga kungba aboro; ho ko nabi irairapai ni, ko aberã nga pa ha, te?

¹²Ono mumungo boro adu na rugatinapai, ho i ka vunga boro ni wa wiri dongi nvuo.

¹³“Ka mo rugu kpotoro yo ni ruru he, mo atáã bero koyo du ko ni.

¹⁴Ka irairapai du ti ro, mo moi he ku sa yo tuturũ, ka mo ídi nga iraira sino si nye tii gamo abamburoko ya.

¹⁵Si du mo ka rengba ti ni ka tumba kpakpuro ku ari zanga zee; mo adú nyanyaki, mo agúnde nga te.

¹⁶Bambiko bangiro agó ti gu pai naafudi ro; mo atíngida pa ha wa kina pa gu ime nasusi ku sa yo.

¹⁷Ungaro ki ha ki susi gu ima uru du bebere uru; ka bitimo vura du, si adú wa kina wiso.

¹⁸Mo adú na ũsongodapai, bambiko maabangirise du ho; mo agbáta pai pati ro, ono mo ki ongodi zezeredi.

¹⁹Mo apí sande, boro agundesi nga ro te; dungu aboro nikazungadi pai be ro.

²⁰Ono bangiri gbegberẽ aboro anyása, gene bata adú nga fu yo ka ora ngba ha te, gayo maabangirise nga kina kpio.”