Read zande Eyobo 12 Bible Online

Eyobo 12 - zande bible

Eyobo 12

¹Eyobo ki karaga pai, ki ya:

²“Kangu ti ni te oni nga agu aboro, tatamana akpi na oni.

³Ono mi du na rugatinapai wa kina roni; pa re aumba nga susi roni te. Da aina nga pa ngbatunga agi apai re ya?

⁴Mi wa gu boro nga ũmongo fu akurani, nga gu boro nayamba he koyo du Mbori ni, ko ki karaga pai fu ni, nga ruru boro, zanga pai ku ri ni, nga ũmongo.

⁵Rogo ga gu ni berã yo du zezeredi, payasi pa ũkpere du; si ima rengba fu agu yo nduyo nazerenge.

⁶Ga abatuka abamburoko nakumuko, agu yo nazingisa Mbori ko zingi fu yo, i zezeredi, nga agu yo ye na gayo mbori kina be yo.

⁷“Ono mo sána anya nvuo awere, ami ayúgo pai foro; na azire ari, ami agúmba pai foro;

⁸watadu mo fura na sende, si ki yugu pai foro; atĩo baime a atáka pande pai foro;

⁹Da dagba agi ahe re dunduko aina nga ya be Yekova namangi gere, ya?

¹⁰Ko du mbisimo unga ahe dunduko be ko, na gu omeonga nga ga aboro dunduko a.

¹¹Tue naasada nga pai wa vuru ngba yo naina ngbanya riahe, te?

¹²Tatamana du ti gbinza aboro, rugatinapai du mbiko gbanga arame.

¹³“Mbori du na tatamana na ngarã; ko du na berá pa apai na rugatinapai a.

¹⁴Ka ko kuadi he ku sande, boro arengba nga ka dua ha berewe te; ka ko kisi boro, boro arengba nga na kusa ni te.

¹⁵Ka ko ka na ime, si ki ugudi dũ; ka ko kedi he berewe, si ki mbiri kpotosende ambira dũ.

¹⁶Ko du na ome na tatamana; nanginangi aboro na banangi yo nga gako yo.

¹⁷Ko nagasa abororondo ku sa yo ki nigbarasi pá yo, ko namungosi pa abasaringbanga.

¹⁸Ko nadia tandu ti abakindo, ki vodi dimoyo na giri dimose.

¹⁹Ko nagasa aboromotumo ku sa yo, ki nigbarasi pa yo, ki bafu airaome.

²⁰Ko nadia fugo be arengbe na pai, ki di ga gbinza aboro rugatinapai ku sa yo.

²¹Ko ki ba wasiro ku ri abarumbatayo, ki zaki ga nyanyaki aboro giri dimose.

²²Ko nabi gasigasi apai ku bitimo yo, ki kusi nduunduu bitimo ku imarago yo.

²³Ko nazugasi rikaaboro, ki ninigbarasi yo a: ko nangeesa rikaaboro, ki nigbandaka yo a.

²⁴Ko nadia bera pai ti agbia aboro du auru kpotosende, ki mangi yo i ta ngbuongbuo rogo ngbakungba adu nga na gene rogo ho ya.

²⁵I natataraga bitimo zanga imarago, ko ki mangi yo i nindu nzaunzau wa kina bakpibuda.”