Read zande Eyobo 13 Bible Online

Eyobo 13 - zande bible

Eyobo 13

¹“Oni ngere, bangire bi agi apai re dunduko, Ture gi he ki rugu tihe na ni.

²Gu pai ini oni, mi ini kina ha a; pa re aumba nga susi roni te.

³Mi kpi nyemu ka fura na gu Ko du na tandu apai dũ, mi kpi nyemu ka ringbisa pa gi ngbanga fu Mbori.

⁴Ono tipa roni, oni nga atonapa zire, oni dunduko du wa agu abinza angba nga ya.

⁵Ako, ka oni ongo aonga dunduko, si ka du ni gaoni tatamana!

⁶Oni gí gi bera pa apai awere, ki ye turoni ka gia gi kpe zungaditise.

⁷Oni agúmba irairapai tipa Mbori, ki gumba pai fu ko ni nangahe?

⁸Oni akpára pa ko rogo gaoni beta, ki mbakadi pai tipa Mbori?

⁹Pai ángba fu roni ho ko ka gbata pa gaoni apai ni? watadu oni rengbe ka nanga ko wa boro nananga kurani?

¹⁰Ko azá roni aza ni rengo, ka si du wa oni akpara pa aboro ni gbuko.

¹¹Gako dukuripai agúndesi nga roni na kiki ko ati nga ti roni a, te?

¹²Gaoni tingiditingidi berãpai ki du wa gu sanza nga ga kuke. Gaoni nyanyaki agbata ki ngia kina agbata pere.

¹³“Oni óngo kii, ki mbu re mi fura, gu pai ki ye fere wa si akpi nyemu he.

¹⁴Tipagine ka mi moi borore ti ni ku ngbare yo, ki di ungare ku bere?

¹⁵Oni ngére, ko aímo re; mi adu nga na maabangirise te; pai ti ni te, mi ambákada gimi apai ku bara bangiriko.

¹⁶Gere adú ni gi bata a, nga gu boro zanga sinombori ni ayé nga ku bara bangiriko te.

¹⁷Oni gí fugore wenengaĩ, gi taka pande pa apai du turoni yo,

¹⁸Oni ngi re, mi rugu pa gi ngbanga; mi ini he i nikasapa ngbanga fere.

¹⁹Da nga gu ni nikadarã pai na mi? Ka boro du ho si ka mi ongo ti ni ki kpi.

²⁰Mo ídi nga pa apai ue fere, si du mi ka oka nga kpakpure ti ni ti ro ya:

²¹mo dí bero ti re tuturũ; ka kiki ro fú nga gunde fere ya.

²²Mo ayamba he, mi akaraga pai; watadu mo mbú re mi fura, mo ki karaga pai fere.

²³Waĩ du bange gimi irairaapai na gi ingapai? Mo yúgu pa gi samungu fere mi ini he na pa gi ingapai.

²⁴Tipagine mo naoka kpakpuro ti ni, ki gedi re wa vuraro?

²⁵Mo afúda yaya kpe ki do fuo ugu kakarika?

²⁶Bambiko mo nake kere nirãnirãpai kuti re, ki ya mi di mosoro ga parangare irairapai.

²⁷Mo namaa ndure a ku rogo angboro, ki nikparia pa gimi agene dunduko; mo nagba gene kirikiri pati re tipa kpandure.

²⁸Mi du wa zirĩhe nanyasa anyasa, wa gu roko riti ayawe he.”