Read zande Eyobo 14 Bible Online

Eyobo 14 - zande bible

Eyobo 14

¹“Gu boro de avungu ni gani arame ni kina guru he gbua, ki hi ahi be fudifudipai.

²Ni kuru wa mbumbuda, ki nyokora; ni naora wa kina nzereme, ka ni aima nga ya.

³Mo niza bangiro ka bi ngbatunga boro wa gu ni re, ki ye na ni sa sarangbanga na mo?

⁴Da rengbe ka kusa gigiri he rogo birikobiriko he yo? A nga boro ho sa te.

⁵Wa du he nga gani arame ni ringbisiringbisi he, gedigedi gani adiwi du kina be ro, mo aringbisi ba gani ngbandarago ya ka ni susi nga ha ya,

⁶si du mo di bangiro ti ni ku sa yo, ni ongodi nga, ni nyasi gani sunge na ngbarago wa boro sunge ti gani uru.

⁷“Bambiko maabangirise du tipa ugu a, ka i de he ku sande, si ki kuru berewe, ka gu fogo ho ambú nga funa ya.

⁸Ka taraha sende yo vura kuruka vurũ, katakpaha ki kpi ku sende yo;

⁹ono mbiko gu taraha nagbida ime si afúna afuna berewe ki kusi abehe wa fogo rũrũ ngua.

¹⁰Ono boro nakpi, ki paya apaya kindi; ono gu boro nafu toroni, wari du ni ni?

¹¹Wa aime nati bungudu ti baime, wiridi ki fu ki ugudi;

¹²wo boro nipi sande ka ni aguari nga berewe ya; daho angbangbaturũ ka adú nga ni berewe ya, ni azínga nga te, watadu zinga be gani rame a ya.

¹³Ako, ka mo oko re ku Baatoro kpikpi aDoro yo, ki banda re ni okooko re, daho ga zinga ka susa ni, ki ringbisi ringbisiringbisi rago fere, ki tingidi pa re!

¹⁴Ka boro kpi, ni adú ni ungani berewe? Pa gimi arame mangapai dunduko mi akasunguda, daho pa kusa re ka da ni.

¹⁵Ka mo ayamba he, mi akaraga pai foro; mo akpi nyemu gu he bero amangi.

¹⁶Ka si adu wo, mo ageda pa dagba ndure, ka mo aberã nga pa gi ingapai ya;

¹⁷gi samungu ki du ni kisikisi he ku mangu yo, mo adada gimi irairaapai.

¹⁸“Ono bagangara nati ki gbandaka ku sa yo, bambia ki gbisi rogo gu ba ha;

¹⁹wa aime nambura ambia; hihi ime nafu na mbudu sende auru kpotosende; kina wo mo nagbarasa ga boro maabangirise.

²⁰Mo nadia be ni nye anye kindi, ono ni nasusa asusa; mo nasa kpakpuni, ki kedi ni ku sa yo.

²¹Awirini nga akumba ye sa irisa, ka ni aina nga ha ya; i ki payasi yo, ono ni aina nga pa ha te.

²²Ono ni ini kina pa ima kpotoni, ni ki nikpari ni aume tipa boroni.”