Read zande Eyobo 15 Bible Online

Eyobo 15 - zande bible

Eyobo 15

¹Erifaza boro Temana ki karaga pai, ki ya:

²“Ka iratatamana karaga pai ni kungba inahe naya aya, ki hisi vuni na kina gu yuge naye uroyo?

³Ka ni saki pai ni gu fura nga fura bau, watadu agu afugo ka ni amanga nga wenepai na ni ya?

⁴Ono mo naba gunde be Mbori ku sa yo, ki dingisa pa kparakpe bara bangiri Mbori.

⁵Bambiko ga irairapai nayugo pai fu ngbaro, mo ki sia gu mirãse nga ga biriki.

⁶Kina ngbaro nakita ngbanga ro, mi te; ii, kpotongbaro du ni dezire kuti ro.

⁷“Mo nga gu bambata boro i avungu ni? Watadu mo i abatika ro mbata fu agangara?

⁸Mo agi gu rondo nga ga Mbori? Mo nadingisa tatamana fu kina ro?

⁹Gini pai ini mo, nga gu ani aina nga ha ya? Gini pai rugu mo tiro na ni, nga gu ani aruga nga tirani na pa ha ya?

¹⁰Agu aboro du na ani du na anvue, na agu yo du ni kina kuru aboro gbe, gbinza gbe ti bamo.

¹¹Ga Mbori pa wasa si ni wiri toni he foro, watadu gu pai namanga ro yee?

¹²Tipagine ngbaduro andu na mo ti ni ku sa yo? Na tipagine mo apira bangiro ti ni?

¹³ya mo sa tororo kuti Mbori, ki idi he ngbatunga agu apai re nikuru ngbaro yo?

¹⁴Gini he nga boro, rengbe ka du ni gigiri ni? watadu gu ni de avungu ni, rengbe ka du ni ruru boro?

¹⁵Mo ngére, Mbori akida nga kuti gako ziazia yo te; du nga angbangbaturũ ni gigiri he bangiriko a te;

¹⁶a ngbatika gu boro du ni kere gbegberẽ ni nazirã azirã, nga gu boro nambira irairapai wa ime!

¹⁷“Mi ayúgo pai foro, mo gi sangba re; gu pai bi mi mi atáka pande he

¹⁸nga gu pai gumba airatatamana, gu abayo aoka nga ha ya,

¹⁹nga kina agu yo i afu ringara fu yo, ka kungba boro asusa nga dagba yo ya.

²⁰Gbegberẽ boro nasaka tini asaka be ima rogo gani arame du, ni gu dungu agarã i afu he tipa barungosi aboro.

²¹Woro gbudagbuda gunde du tuni yo; rago gani zereda bagbarasi he aye ku ri ni.

²²Ni aberã nga ha ya ni akáraga tini bitimo yo berewe te, i ringbisi kina basape tipa ni.

²³Ni nata tuturũ tipa riahe, niya, ‘Wari du he ni?’ Ni ini he ya rago bitimo ima mbeda na ni;

²⁴rungosi na imisiripai nagundesi ni; si di be ni, wa gu bakindo ima mbakada tiko sa vura.

²⁵Bambiko ni taĩ beni ka so vura kuti Mbori, ki nimangi gani pai ni ruka kuti gu Ko du na tandu apai dũ,

²⁶ki ninyakasi gorõni ka ora sa ko, na nyanyaki amarã ti gani vurakube;

²⁷bambiko ni adadi kpakpuni na gani nzeme, ni adungura nzeme ti ngba dimoni,

²⁸ni araki kina rogo bate agbata, rogo agu abambu arengba nga aboro ka ra rogo ho ya, nga gu ringbisi yo ho ni guguda.

²⁹Ni adú nga ni irakumuko te, gani ahe aíma nga a te, gani idiidi ahe aída nga fu ni a te.

³⁰Ni amérã nga be bitimo te; mirãwe nikaugusa gani tamahe, yuge ayá na mbumbudaha ku sa yo.

³¹Ka ni kída nga kuti kungba pai ya, ni nanga tini, bambiko kina kungba pai nikangia gani mosoro.

³²I afú he fu ni dũ mbata fu gani rago, behe adú nga ni iwo ho te.

³³Ni azígizo gani agba rindikakue wa bakakue, ki bafu gani mbumbuda ku sa yo wa ngua eraya.

³⁴Bambiko gu rika aboro nga azangasinombori du wa zangada, we nikarita ga aboro mabirimo abamburoko.

³⁵I du na mobara gbegberepai, ki vungu kina irairapai, kpotoyo yo nambakada pa nangahe.”