Read zande Eyobo 16 Bible Online

Eyobo 16 - zande bible

Eyobo 16

¹Eyobo ki karaga pai, ki ya:

²“Mi gi dungu ngbatunga apai; oni nga kina gbegberẽ abangarási boro dunduko.

³Digida kungba fugo ti ni? Na gini he nazingisa roni oni akaraga pai ti ni?

⁴Mi rengbe ka fura a wa kina roni, ka oni adu ku ba re; ka mi akpamia fugo wa sa kuti roni, ki pikipo rire koyo du oni ni.

⁵Mi rengbe ka nyakasa roni na fugo ngbare, gu pa wasa du ngbare azéresa gaoni rungo.

⁶“Ka mi vura gumba pai, gi ima azera nga te, ka mi vura hi pai, pai waĩ nikambu re?

⁷Ni rengo Mbori mangi re mi mbu gbe, ko mangi gi rika dunduko wa bate.

⁸Ono mo azi re nyanyaki, nga dezire kuti re; ii, gi uguda guari kuti re, si nayugo dezirepai kina ku bangire.

⁹Ko sipi re ni kina gako zinga, ki nisogo re. Ko ari ngba rindiko kuti re; vurare nazaraga bangiriko kuti re.

¹⁰Aboro aka ngbayo kuti re, i ata re ti biringa ngbare ni soapai kuti re, i dungura tiyo wa sa dunduko kuti re.

¹¹Mbori fu re ku be azangasinombori, ki ba re ku be gbegberẽ aboro.

¹²Mi adu zezeredi, ko ki kuadi re akuadi ngbingbi; ii, ko zi re ti kina gore, ki foko re mbusumbusu. Ko moi re ku ari wa fuohe tipa zuma ha;

¹³gako abaaguanza navo gbu pati re kirikiri. Ko nakafa gimi agbiiri kpakpa, ka ko ambu nga ha ya. Ko nauka kikpare ku sande.

¹⁴Ko nahoga re na oro ku ri aoro, ko nayara sa re wa kina iraome.

¹⁵Mi rũngu mbuzaroko kuti kpotore, mi moi omere ku nvutu yo.

¹⁶Kpakpure adiadi be kpara ni aume, nduunduu bitimo du ri puku bangire;

¹⁷wa adu nga pa zuu bere ya, gi kpe du ni gigiri he.

¹⁸“Ako kpotosende, ka mo dádi nga kurere ya, ka baongoda dú nga fu gi kpe a ya.

¹⁹Zavura awere, mo ngére, gi dezire du ngbangbaturũ yo, gu ko idi pa du tipa re ko du ari yo.

²⁰Abadiangbare napayasi pa re; ono bangire naga na aume fu Mbori;

²¹ya ko mbakadi ga boro rurupai fu Mbori, wa ga boro fu kurani.

²²Bambiko ho agara ka susa ni ni umba ha, mi andú ngba gu gene yo mi ka karaga nga tire ni berewe ya.”