Read zande Eyobo 17 Bible Online

Eyobo 17 - zande bible

Eyobo 17

¹“Torore nanyasa, gimi arame nyasi, due ima rengba tipa re.

²Ni rengo dungu asawiare du kirikiri pati re, bangire du kuti gayo nirãnirãpai.

³“Mo fú ngbaanga fere awere ni tiro; da du yo nikadu ku ba re?

⁴Wa mo nakisi gayo berã ti ruga tinapai, si du mo akíisa nga pa yo te.

⁵Gu ni nazomia pa abadiangbani tipa roga gayo ahe, bangiri awirini adú nga ti ni te.

⁶“Ko sa re wa ũsanza fu aboro; mi du wa ũpayasi gbayaga.

⁷Du bangire yo adu ratutu be rungo, du apare adu wa kina nzereme.

⁸Ruru aboro nakiga akiga be gi pai re, ono boro Wenesa awo ti azangasinombori.

⁹Ono ruru boro aka kuti gani pai, gu ni du beni ni gigiri he anyáka anyaka ki susi.

¹⁰Ono oni káraga tironi, oni dundu ko, ki ye berewe, mi abí nga iratatamana dagba roni yo te.

¹¹Gimi arame susi, gi mbakada pa pai gberẽ, na gimi aberã ku kpotore yo a.

¹²I nasa yuru wa uru; i naya, ‘Imarago mbembedi na bitimo.’

¹³Ka mi ngere tipa Baatoro kpikpi aboro wa gi bambu, ka mi moi gi barame ku bitimo yo,

¹⁴ka mi ya fu bazirã wẽ, ‘Mo nga buba,’ na fu gbirẽ wẽ, ‘Mo nga nina,’ watadu ‘Dawire,’

¹⁵wari tie du gi maabangirise ni? Da nikabi gi maabangirise?

¹⁶Si azóra kuti susu Baatoro kpikpi aboro? Ani azóra wa sa ku nvutu yo?”