Read zande Eyobo 18 Bible Online

Eyobo 18 - zande bible

Eyobo 18

¹Biridada boro Sua ki karaga pai, ki ya:

²“Mo agbáta afugo tipa gbanga rago waĩ? Mo bérẽ nga pai, fuo gure ani afúra.

³Tipagine i nageda rani ti ni wa kina zogozogo anya? Tipagine du ani ti ni bangiro wa birikobiriko he?

⁴Wa mo asipa kpotoro be ga zinga, i ambú zegino mbiko ro, watadu mbia agbisa rogo gu ba ha?

⁵“Ii, i bisi gu imarago nga ga gbegberẽ boro, ima gani we akĩ nga te.

⁶Kina bitimo du tii gani bamburoko yo, gani baro bisi asi ba ri ni.

⁷Ome gani nduge guru, kina gani rugapai ba ni ku sande.

⁸Bambiko kina nduni ba ni ku pio yo, ni nandu wa ri gbina due.

⁹Ngindi ki zi ni ti gidoni, gbina ki zi ni nyanyaki.

¹⁰Gbina baasi du ni okooko ho fu ni ku tii sende yo, i are gbina fu ni ngba gene.

¹¹Ũgbudagbuda naba gunde ti ni rogo arago dũ, ki do ni ti fuo ni.

¹²Omeni naumba wa be gomoro, gberãngbi du ni mbakadimbakadi he nasunguda ni.

¹³Si riti apani dũ, ii, bambata wiri kpio narita apani du.

¹⁴I amo ni amo rogo gu gani bamburoko ni akida kuti ni, ki ye na ni koyo du bakindo gbudagbuda ni.

¹⁵Ahe araka rogo gani bamburoko angia nga gani he ya; i ba baruti ku ri gani kporo.

¹⁶Tarani ugu tii ni yo dũ, abeni nyokora ku ari.

¹⁷Tingida pa ni go ago auru kpotosende, ka rimoni awo nga ti gene kporo ya.

¹⁸I do ni imarago yo ku bitimo yo, ki do ni ku zegi yo rogo zegino.

¹⁹Ni adu nga na awirini na atitani dagba gani aboro yo te, unga boro anye nga fu ni yo ni araki ni te.

²⁰Agu yo du ku dioyo nakiga akiga kuti gani arame, agu yo gunde azi yo du ku uroyo.

²¹Ni rengo wa du pa gu raka nga ga azangasinombori, wa du pa ba gu ni aina nga Mbori ya.”