Read zande Eyobo 19 Bible Online

Eyobo 19 - zande bible

Eyobo 19

¹Eyobo ki karaga pai, ki ya:

²“Oni arúngosi re tipa gbanga rago waĩ, ki nikuadi re rukutu ni afugo?

³Bara bawehe nga gere oni nisoi pai kuti re kindi, zee amanga nga roni wa oni afura na mi nyanyaki, te?

⁴Ono ka si du ni rengo nga mi ingi, gi ingapai nye kina kuti re.

⁵Ono ka oni akiisa tironi kuti re ni rengo, ki nizungadi gi pai kuti re ni soapai,

⁶oni ini he awere ya Mbori gbarasi gi pai, ki re gako pio pati re kirikiri.

⁷Oni ngere, mi kpari ku ari ki ya ‘Pa zuu du!’ ono boro akaraga nga pai te. Mi yambu he ni wawa, ono ruru sarangbanga ho te.

⁸Ko vo ndugu ngba gi gene, ka mi arengba nga ka susa ya, ko moi bitimo ngba gimi agene.

⁹Ko uru gi taarimo ti re, ki di gi kpakpari bakindo ri re yo.

¹⁰Ko nakuadi re ku sande rogo arago du, ono mi ndu, ko mo gi maabangirise wa mo ngua.

¹¹Ko zingisi gako zinga kuti re, ko nageda re wa boro dagba avurako yo.

¹²Gako rikavura naye wa sa, ki kisi gayo gene kuti re, ki zi gayo bataya pati gi bamburoko kirikiri.

¹³“Ko gbisi awirinami tuturũ ti re, ainidire nagindiga re dunduko.

¹⁴Angbatungare na abadiangbare mbu re;

¹⁵agu agino naraka kpure yo bangiriyo go ti re; gimi anagbindi sa re wa kungba boro; mi bangiriyo wa kare boro.

¹⁶Mi yambu gi moyambu, ono ka ko akaraga nga pai fere ya; mi ka zungadi ko ni ngbare.

¹⁷Woro ongare gberẽ ti diare, na gi kpe fu awiri vuru nina.

¹⁸Zavura paranga agude, i nagindiga re agindiga; ho guari mi ni, i nagumba pai kuti re.

¹⁹Agu abadiangbare dunduko inidi re i sogo re, agu yo mi akpi nyemu yo sa tiyo kuti re.

²⁰Amemere dika tihe kuti kpotore na kuti pasiore, mi bati wa kina vunde kpakpu mbia yo.

²¹Ako abadiangbare, nungare mángi roni, nungare mángi roni, bambiko be Mbori zadi re!

²²Tipagine oni narungosi re ti ni wa Mbori? Tipagine oni ambi nga be pasiore ti ni ya?

²³“Ako, ka i ke fugore awere! Ako, ka i ke he ku kitabu yo!

²⁴Ako, ka wiringua mará du na rindihe gbaki he ti mbia nye anye kindi!

²⁵Bambiko mi ini he ya Batumore du ni ungako, ko aru arú ri kpotosende ti yangara rago.

²⁶Fuo nyasa kpotore were i nagbarasi he, mi abí Mbori abi ni borore.

²⁷Mi ni tire abí ko, bangire angéra, ono ga kura boro te. He namaka re berãre yo!

²⁸Ka oni ya, ‘Waĩ ani ka manga ro!’ na, ‘Ani bi tara gu pai re kina ti ko’;

²⁹oni gúnde be basape, bambiko zinga naye na gu mbusa nga ga basape, oni ini he nga sarangbanga kina ho.”