Read zande Eyobo 20 Bible Online

Eyobo 20 - zande bible

Eyobo 20

¹Sofara boro Nama ki karaga pai, ki ya:

²“Bambiko gu ipiipi pai dũ rogo re yo, si du gi berá akaraga pai ti ni fere.

³Mi gi pa gu zapai nafu kina zee fere, gi toro rugatinapai Ki karaga pai fere.

⁴Mo aina nga pa gere bakuru yo, wa i afu aboro ku ri kpotosende,

⁵ya gu diasima nga ga gbegbere boro, si ni kina guru he, te? gu ngbarago nga ga azangasinombori si tipa guru rago a, te?

⁶Ka gani rengbe na pai vura bita ki da ku angbangbaturũ yo, rini ki da ku mai yo,

⁷ni akpí nye anye kindi wa kina regboni; agu yo nabi ni i ayá, ‘Wari du ni ni?’

⁸Ni abírikpo wa musumo, ka i abi nga ni ya, i adánda ni ku sa yo wa yuguyuguhe nga ga yuru.

⁹Gu bangirise naabi ni abí nga ni berewe te, gani ba abi nga ni berewe a te.

¹⁰Awirini agbáta inapai be rurungbura aboro, beni agása gani ũkumuko.

¹¹Amemeni hiki be pa parangani, ono si apí na ni kina ku nvutu yo.

¹²“Ka gbegberẽpai vura nzira ngbani, ka ni vura iga ha ku tii mirãni yo;

¹³ka ni vura zia ha, ka ni aida nga si guari ya, ono ni ki ka na ni kindi ku vuru ngbani yo;

¹⁴ono gani riahe ku kunduni yo ki sa tihe, si wa kina kikpa kere awo vuruni yo.

¹⁵Ni nambira aũkumuko, ki nisuku he berewe; Mbori nabafa ha vuni yo ku zegi yo.

¹⁶Ni anyóra gu kere ngua nga ga kere awo; mirã wo aimo ni.

¹⁷Ni angéra nga ku ri adi nga gu nzeme anyege na nzeme mamuanya nafu rogo ho te.

¹⁸Ni agása zuzu gani sunge, ni ambíra nga ha te; gu mokiisa ni abi he tipa gani bagaahe, ni angí nga mbiko ho te.

¹⁹Bambiko ni arungosi rurungbura aboro ki mbu yo, si du ni adi bambu ni zuu, nga gu ni adua nga ha ya.

²⁰“Bambiko wa gani kpihe azereda nga ya, ni aíga nga gu he ka rago ngba ti ni mbiko ho wa sa te.

²¹A nga he nanye nga gu ni arita nga ha ya te; si du gani ũkumuko ka ima nga ti ni ya.

²²Rogo gani hibepai zingohe azánga nga ni te; be agu yo dunduko du rogo rungo aye ku ri ni.

²³Mbori abá gako ngariangaria zinga ku ri ni, ka hiisa vuni yo dũ. Si ki nina ku ri ni wa mai ni gani riahe.

²⁴Ni aóra be ũvura nga marã; guanza sirigi akóra vuni.

²⁵Ni ki gbe he yo, si ki kuru kpotoni yo, imaima rindihe ki nikuru rogo kikpani yo; gunde ki zi ni.

²⁶Nduunduu bitimo nasunguda gani aũkumuko; gu we boro ka autuda nga ha ya, nikarita ni; agu ahe nye rogo gani bamburoko anyása anyasa.

²⁷Angbangbaturũ akusa gani irairaapai, kpotosende ki zingi kuti ni.

²⁸Gu badungu ahe du kpuni yo i agá aga na ni, ki nigbe he ku sa yo ti rago ga Mbori zinga.

²⁹Gere nga ga gbegbere boro kparakpara he be Mbori, nga gu pai Mbori aringbisi pa ha fu ni.”