Read zande Eyobo 21 Bible Online

Eyobo 21 - zande bible

Eyobo 21

¹Eyobo ki karaga pai, ki ya:

²“Oni gí fugore wenengaĩ, gere ki du ni gaoni pa wasa.

³Oni ídi he fere, mi afúra, fuo gumba mi pai, oni nimómu re kindi.

⁴Ono tipa re, gi kpakana he kuti boro? Tipagine ka mi azinga nga ti ni ni ipo ya?

⁵Oni ngére ka bi nga re, ki kigi, ki moi beroni ti ngbaroni.

⁶Ho tingidi mi pa ha ni mi nidu ni fudifudi re, kpotore ki nzinzo be gbudagbuda.

⁷Tipagine du gbegbere aboro ti ni ni ungayo, ki nigbinza, ki du na nyaka na ome?

⁸Awiriyo nanyakada ku bara bangiriyo, a wa sa na atitayo ku bangiriyo.

⁹He kpuyo yo ka i gunde be he te, ga Mbori mbusa ri yo a te.

¹⁰Gayo babagara navunga, ka u anzita nga ya; gayo nabagara nabatika, ka u aba nga wiru ya.

¹¹I nakeda rukutu awiriyo ku mbata yo wa rimbasa akandoro, awiriyo ki nido gbere.

¹²I nabi bia na gaza na nzenze, ki ningi kuti woro kpangi.

¹³I naraka gayo arame na wenepia, ki ndu ku Baatoro kpikpi aboro yo na zereda.

¹⁴Ono ya yo fu Mbori wẽ, ‘Mo gúari ti rani! Ani akpi nga nyemu ka ina gamo apai te.

¹⁵Gini boro nga gu Ko du na tandu apai dũ, ka ani mangi pa ko? na gini u ka ani di, ka ani kpari fu ko?’

¹⁶Mo ngére, a nga gayo ũkumuko kina be yo, te? gu rugapai nga ga gbegberẽ aboro si turũ ti re.

¹⁷“I bisi ga gbegbere aboro we atara bara waĩ? Gayo gberãngbi ye ku ri yo bara wai? Ati Mbori kparaka arungo rogo gako zinga?

¹⁸A nga i wa kina kazimorũ barangba yuge, na wa gu ũmuhe bayuge nayada ha, te?

¹⁹Ya oni, ‘Mbori naiga gayo irairapai tipa awiriyo.’ Ko iri bape kuti yo, ya i ini he.

²⁰Boro bangiriyo bi gayo gbarasapai, i mbíri gu zinga nga ga gu Ko du na tandu apai dũ.

²¹Bambiko gini pai i aberã tipa kpuyo fuo gbarasa yo, ho i ka gurusa gedigedi gayo adiwi ni?

²²Boro ayúgo inahe fu Mbori wa du ko nasapa ngbanga agu yo du ni tumbatumba yo?

²³Gu boro nakpi na nzunzu omeni, ho du ni ni zezeredi dunduko, ki du ni bandabanda ni,

²⁴kpotoni ki du ngapungapu, nzeme memeni ki du motomoto.

²⁵Gu kura ni nakpi rogo nirãnirã kpio fu mbisimo, ni ata ina nga pa wene he wa sa te.

²⁶Ono i ue napi ku nvutu yo wa sa, agbirẽ ki ukadi yo.

²⁷Oni ngere, mi ini pa gaoni aberã, na pa gu gbegbere sangaapai oni asanga kuti re.

²⁸Bambiko ya oni, ‘Wari du ku wiri bakindo ni? Wari du gu bamburoko ni gbegberẽ aboro araka rogo?’

²⁹Oni nasana nga agu yo nindu ngba gu gene te re? Oni aida nga na gayo dezirepai

³⁰ya gbegberẽ boro du ni bandabanda ni ti uru gberángbi, i ki batasi ni ti uru dingidingi ngbaduse, te?

³¹Da nikataka pande gani pai ku bangirini, da nikaira bape pa agu apai fu ni ni amangi?

³²Ho i ka tinda ni ni ku murã yo, i abanda bakpisida ni abanda.

³³Gu undu sende du ngboongboorago yo nikangba tipa ni; aboro dunduko ki pe fuo ni, agu yo nandu mbata fu ni susi bageda yo.

³⁴Tipagine tie oni angarãsa re ti ni gbua? wa du gaoni karagapai nga kina pa zire.”