Read zande Eyobo 22 Bible Online

Eyobo 22 - zande bible

Eyobo 22

¹Erifaza boro Temana ki karaga pai, ki ya:

²“Boro rengbe nadu ni ũu fu Mbori? Ni rengo gu ni nga iratatamana, ni nau fu kina tini.

³Rago angba ti gu Ko du na tandu apai dũ, ka mo du ni ruru boro, watadu si nga ũu fu ko, ka mo amanga gamo apai ziazia?

⁴Ko naza ro mbiko ga gunde ti ko, ki ndu na mo sa sarangbanga?

⁵A nga ga gbegberẽpai ni babakere he te? A nga digida ga irairaapai ti ni te?

⁶Bambiko mo azi ido tipa awirinamo gbua, ki uru roko ti kundiri aboro.

⁷Mo afu nga ime fu boro mbugo ni mbiri he te, mo ka na riahe be boro gomoro.

⁸Ono kangarã boro du ringara be ni; irisiirisi boro ki niraki rogo ho.

⁹Mo asia adekurugbo i ga ni ku beyo, be awirinyaure kuadi.

¹⁰Si du du agbina pati ro ti ni kirikiri, zigba di be ro,

¹¹ga imarago bisi, mo arengba nga ka bi ahe te, ono ime afu auru ro kpaima.

¹²“A nga Mbori ari yo tuturũ te? Mo ngére ka bi akerekuru tuturũ, waĩ turũ ami!

¹³Si du mo naya ti ni, ‘Gini pai ini Mbori? Ko rengbe ka sara ngbanga ku rogo nduunduu bitimo yo?

¹⁴Nanaga dubo ukadi ko, ka ko bi nga he te, ko nata ti vuro ngbangbaturũ dunduko.’

¹⁵Mo aká kuti gu kuru pai kindi nga gu gbegberẽ aboro asimbi?

¹⁶I aima tuka yo mbata fu gayo rago, mburu gayo pai afu wa wiridi ku sa yo,

¹⁷ya yo fu Mbori wẽ, ‘Mo gúari ti rani,’ na, ‘Gini pai ka gu Ko du na tandu apai dũ mangi he fu rani?’

¹⁸Ono ko ahisi gayo abambu na wene ahe― ono gu rugapai nga ga gbegberẽ aboro du ti re tuturũ.

¹⁹Gu ruru yo bi he, ki du pusiapusia; boro wenesa ki ta moma yo ki niumo yo,

²⁰niya, ‘Ni rengo agu yo nazingi kuti rani i rogo yo ku sa yo, na gu yangara yo nye we ki riti yo.’

²¹“Mo íni Mbori awere, ka du zeze redi; si du wenepai ka ye ti ni foro.

²²Mo dí gu rugute du ngbako ku gume, ki moi gako apai ku ngbaduro yo.

²³Ka mo karaga tiro fu gu Ko du na tandu apai dũ, mo adũ nyanyaki, ka mo moi irairapai tuturũ ti gamo abamburoko,

²⁴ka mo moi ga ũkumuko ku nvutu yo, na gu dahabu nga ga Ofiri ku dagba ambia wiriadi,

²⁵ka gu Ko du na tandu apai dũ du ni ga bawene ũkumuko, ni ga kikiipa feda;

²⁶si du rago ka ngba ti ni ti ro rogo gu Ko du na tandu apai dũ, mo ki tumba kpakpuro ku ari fu Mbori.

²⁷Mo akpára ga kpe fu ko, ko agía pa ro agia; mo adigisa pa manga gamo akidohe.

²⁸Mo arú ndika, si ki du ni nyakasinyakasi he fu kina ro; imarago ahása rago ku ri gamo apai.

²⁹Mbori nazogosa airaruka, ono ko nabatasa gu boro naumbasi tini.

³⁰Ko abátasa gu boro zanga wenesa a; ni abata mbiko bero du gigiri.”