Read zande Eyobo 24 Bible Online

Eyobo 24 - zande bible

Eyobo 24

¹“Tipagine adu nga arago sarangbanga ti ni ni ringbisiringbisi he be gu Ko du na tandu apai dũ ya? na tipagine agu yo ini ko abi nga gako arago ti ni wa sa ya?

²Aboro kina ho nagbisa bangbandarago; i nazia rimbasa akandoro, ka riga ra.

³I nado ga awirinyaure dongi ku sa yo, i nadia ga dekurugbo bagara ni ngbaanga.

⁴I naaria irazingohe ku sa yo ngba gene, rungorungo aboro nga ga zegino yo gbu wa sa.

⁵Oni ngére, i nandu sa gayo sunge wa adongi nvuo ngbakungba yo, ki nigbata ũngba ngbakungba yo kakaka ni riahe tipa awiriyo.

⁶I nadungura ga anya riahe nvuo yo, ki nidungura futu bakakue nga ga gbegberẽ boro.

⁷I napi rogo yuru sasasa ni kina kundiri yo, zanga ukadi roko, ka roko zere adu nga auru yo ya.

⁸I du tomotomo be gu moromoro mai nana ri abaagangara yo, ki nizi mbia be zingo bagbuko.

⁹Aboro kina ho naroga awirinyaure ti ngba mai, ki di fogo wiri rungorungo boro ni ngbaanga.

¹⁰I nata ni kundiri yo, zanga ukadi roko; wa gomoro namanga yo i natinda vodivodi zende ahe.

¹¹I napira nzeme ti ga gbegberẽ aboro angua eraya; i nasimba imekakue bapira ha yo, ono gomoro ime namanga yo.

¹²Bakporo yo uko agu yo nasamba apaa ni, toro agu yo hogi yo yo ki nikpari ni wawa tipa undahe; ono Mbori adega nga tuko sa gayo akpe te.

¹³“Agu aboro kina ho nasa mungu kuti imarago, nga agu yo ainida nga gaha apai ya, asunga nga ngba gaha agene a ya.

¹⁴Baimiboro nazinga nvuunvuu rago, ka imo rungorungo boro na irazingohe; yuru ni du wa iradi.

¹⁵Bangiri irabari nasunguda pa nziinzii rago, ni ki ya, ‘Bangirise abí nga re wa sa te’; ni ki dadi kpakpuni ni he.

¹⁶1 nakofa rogo abambu bitimo, i ki gbuku uru, i aida nga na imarago te.

¹⁷Bambiko wiso fu yo dunduko wa nduunduu bitimo; bambiko i nga abadia gu gbudagbuda nga ga nduunduu bitimo.

¹⁸“Ya oni, ‘Ime nafu na yo ni ipo bangiri aime; gayo ahe ni tiwatiwa ha auru kpotosende; a nga basimbi bakakue ho nandu ku rogo gayo ati bakakue te.

¹⁹Wa ugure na faarago nanyota aime morogumba; wo Baatoro kpikpi aboro namanga fu agu yo mangi ingapai.

²⁰Bangiri rukumbu nago ago tipa yo; agbiré ki ye ka ri yo nzinziri, i atingida nga pa yo berewe te, i nakua irairapai wa ngua.’

²¹“I nanyasa agu yo nga airazangada avunga nga ya; ka i amanga nga wenepai fu dekurugbo a ya.

²²Ono Mbori nagizasi unga airaome be gako tandu; i naguari ku ari ho bati ome unga ni ti yo.

²³Mbori nafu zereda fu yo, i nidu ni songodisongodi yo, bangiriko ki du ku ri gayo apai.

²⁴I kiisi pa yo tipa rago ngbutuko, fuo gure ka i adu nga ho ya; ii, i umbasi yo, i rogo yo ku sa yo wa akura yo dunduko, ki kafu yo ku sa yo wa bangiri zende ahe.

²⁵Ka si adu nga wo ya awere, da nikayugo re ni irazire, ka yugo furare wa kungba ahe gbua?”