Read zande Eyobo 28 Bible Online

Eyobo 28 - zande bible

Eyobo 28

¹“Ni rengo badue feda du ho, Na bafurusa dahabu du ho a.

²I nakusa mará sende yo, ki nizaragasi sirigi ti mbia.

³Aboro nadigisa pa bitimo, ki nigbata gu bangbandarago du ku mbata yo, na ambia du iyo bitimo yo na gu du nduunduu bitimo yo.

⁴I nage due ngboongboorago yo tuturũ ti baraka aboro; bangiri aboro nunguro go tipa yo, i asi yo tuturũ ti aboro, i naba teetee.

⁵Ono tipa kpotosende, riahe naye rogo ho; ono si nasa tihe tii he yo wa we nasa ahe.

⁶Agu ambia du yo nga ba ge safira, sende dahabu du yo a.

⁷“Gu gene re, a nga zire bariakurai ho ini pa ha te, nzagu abi nga ha ni bangiriru te.

⁸Anya rinde andu nga yo te; kere bahu asusa nga ngba gu gene re a te.

⁹“Boro namaa beni ri mbia nganga, ki nisaki abaagangara ni mburu he.

¹⁰Ni nagbaka agene dagba ambia, bangirini nabi kikiipa ahe dunduko.

¹¹Ni nakisa wiriadi ka si fu nga ya. Gu he du ni okooko ho ni nakusa ha ku imarago.

¹²“Ono wari i ka bi tatamana ni? Wari du ba rugatinapai ni?

¹³Boro aina nga pa genoho te, i abi nga ha rogo ringara unga aboro a te.

¹⁴Dudungura rago naya, ‘Si rogo re no te,’ baime naya, ‘Si no du mi ni te.’

¹⁵1 arengba nga ka ngbe he na dahabu te, ka i ringbisi nga feda tipa genoho te.

¹⁶I arengba nga na geda genoho wa sa na gu dahabu nga ga Ofira te, na gu kikiipa mbia wa oniki, watadu safira.

¹⁷Dahabu na mbia ngana arengba nga na pa ha te, i aunda nga ha na gu fongo nga ga wene dahabu a te.

¹⁸I ape nga pa kuru meme anyaime du wa mbia, watadu pa ziazia mbia ngana te; geno tatamana kii susi geno ngungungu ambia fongo.

¹⁹Gu mbia nga topazo nga ga Etiopia arengba nga na ni te, ka i gedi nga genoho wa sa na ndikidi dahabu te.

²⁰“Wari tie tatamana naye ni? Na wari du ba rugatinapai ni?

²¹Si ni okooko he ti bangiri unga aboro dũ, ki du ni gbugbu he be azire ari.

²²Bagbarasahe na kpio naya, ‘Ani agi mboimboi pa ha ni turani.’

²³“Mbori rugu tiko na pa genehe, ko ini baraha a.

²⁴Bambiko ko nangera kuti digida zegino, ki nibi agu ahe du tii ngbangbaturũ no dunduko.

²⁵Ho ko aringbisi barõa yuge ni, ki kparaka aime na uringbisahe;

²⁶ho ko arũ ndika ni tipa mai, na gene tipa ikpira gumba;

²⁷ko ki bi he tie, ki taki pande pa ha; ko anyakasi he, ki nigbata ha.

²⁸Ko ki ya fu boro, ‘Mo ngére, gunde ti Mbori, si nga tatamana; ka guari pati gbigbitapai nga rugatinapai.’ ”