Read zande Eyobo 29 Bible Online

Eyobo 29 - zande bible

Eyobo 29

¹Eyobo ki tona gumba gako pai berewe, ki ya:

²“Ako, ka mi nidu wa gu mi adu rogo agu adiwi naasusi, wa ni gu uru ho Mbori abanda re ni;

³ho gako we atara ahasi rago ni ku ri re, mi ki nita bitimo rogo gako imarago;

⁴wa mi adu ti rago kadumbare, ni gu rago ga Mbori ngbanya adu fere ku ri gi bamburoko.

⁵Ho gu Ko du na tandu apai dũ adu ni na mi, awire ki du pati re kirikiri a;

⁶ni gu rago i azundu fuo ndure na nzeme mamuanya, mbia ki niuka nzeme fere ti dede agenehe!

⁷Ho mi anikuru ni ku zegi yo ku ngbadimo bakporo, ki nimbakadi gi basunga ti gene bakporo,

⁸paranga akumba anibi re ki ni gbuku, gbinza aboro ki niguari ki ru;

⁹abazogo ki nimbu fura, ki nimoi beyo ti ngbayo;

¹⁰fugo abarumbatayo ki nizere, mirãyo ki dika tihe kuti biringa ngbayo.

¹¹Ho tue anigi pa re ni, si ki niya ti re boro maku; ho bangirise anibi he ni, si ki nidu ni dezire;

¹²bambiko mi ninabatasa rungorungo boro ninakpara, na awirinyaure a wo, nga gu ni adu nga na boro ka unda ni ya.

¹³Gu maku nga ga gu ni nasamba aye ku ri re, mi ki mangi kpoto dekurugbo yo ri bi bia ni ngbarago.

¹⁴Mi ki ukadi rurupai, si ki du wa gi roko. Gi ruru sino adu wa gbanga baukadi na kaĩkaĩ rokori.

¹⁵Mi anidu wa bangirise fu iravurari, ki nidu wa ndue fu terengeterenge boro.

¹⁶Mi anidu wa ba fu airazingohe, mi anigbata pa ga gu ni pai mi aina nga ni ya.

¹⁷Mi ki nikua biringa ngba iraira boro, ki nimo pasio ngba rindini.

¹⁸Mi ki beré he tigimi, ‘Mi akpí kina rogo gi bambu, mi angéesa gimi arame wa ngume,

¹⁹tarare ki rimi ki da ku aime yo, ndomo ki niti ku auru bere na ayuru dunduko,

²⁰gi taarimo ki nidu wa vovo ho rogo re yo, gi mboto ki nidu ni mbakadimbakadi he ku be re.’

²¹“Aboro ki niye tuyo fere, ki nisungudi re, ki niongo kii tipa gi rugapai.

²²Fuo fura mi, i afura nga berewe te, gi pai ki zorõ ku ri yo.

²³I ki nisungudi re wa i nasunguda mai, i ki niza ngbayo gbagaza wa tipa bambata mai.

²⁴Ho i adu nga ni na maabangirise ti yo ya, mi ki ningere koyo du yo ni na kpakpure kpasakpasa; i aba nga gu imarago nga ga kpakpure ku sande te.

²⁵Mi anasia pai, ki nisungu wa gbia, ki niraki wa bakindo dagba gako rika vura, wa gu boro ninangarãsa akparikpe.”