Read zande Eyobo 3 Bible Online

Eyobo 3 - zande bible

Eyobo 3

¹Fuo gere Eyobo ki za ngbako, ka gberá ngbako yo fu uru batika ko.

³“Gu uru nyási ke i avungu re rogo, na gu yuru i aya, ‘Kumbagude du ri na mobara ko.’

⁴Gu uru re bíri ke! Ka Mbori gbáta nga pa gu uru re ya, ka rago há nga ku ri gu uru re a ya.

⁵Kina iyo rago na nduunduu bitimo dú ti ni. Kina dubo dadi he; aũbirisa uru gúndesi he.

⁶Tipa gu uru re―nduunduu bitimo zí he! ka si ngí nga dagba auru gará yo ya, ka i gédi nga ha ku dagba adiwi yo a ya.

⁷Ni rengo, gu uru re nyé anye gbua, ka i gí nga fugo ngbarago rogo ho ya.

⁸Agu aboro ninatiwa uru i tíwa gu uru re a, nga agu aboro rengbe ka zingisa nyaime.

⁹Bitimo zí agu akerekuru kuru nziinzii rago; si súngudi pa imarago, ono ka si abí nga ha ya, ka si abi nga girarago a ya;

¹⁰bambiko si akisa nga ngba rukumbu nina te, ka si aoka nga rungo ti re a ya.

¹¹“Tipagine mi akpi nga ti ni kina rago batika re ya? tipagine mi akura nga rukumbu yo ti ni ki kpi ya?

¹²Tipagine rukusu boro adi re ti ni? na gu mamuse mi aha?

¹³Bambiko ka si adu nga wo ya ka mi api ki du zezeredi; ka mi ara; si du ka mi azeredi ti ni,

¹⁴wa sa na abakindo na abororondo nga ga kpotosende yo, nga agu yo naambakadi kungba arago tipa yo,

¹⁵watadu na agu abazogo naadu na dahabu, naahiisi gayo abambu na feda.

¹⁶Ka mi adu wa agba gude i nivungu ru mbata fu rago vunga ru; wa agu agude abi nga imarago wa sa ya.

¹⁷Yo gbegberẽ aboro ka abi nga rungosiro ni ya; yo aboro mbugo ka aongoda ni.

¹⁸Yo zizi aboro ka sunga ni wa sa zezeredi; i agía nga fugo bairasunge te.

¹⁹Umba pa aboro na kindigi pa yo du yo; ka moyambu adu nga tii be bairani berewe ya.

²⁰“Tipagine imarago nahasa rago ti ni fu gu ni du na kere rungo; na unga fu gu ni du toroni rogo nirãnirapai,

²¹nga agu yo nakpi nyemu kpio, ka si aye nga fu yo ya, nagbata kpio susi okooko ũkumuko;

²²nangi ki susi, ki du pusiapusia, ho i nabi murã ni?

²³Tipagine imarago nahasa rago ti ni fu gu ni du gani pai ni okooko ho, nga gu ni kisi Mbori rago pati ni?

²⁴Bambiko gi uko naye wa ye gi riahe, gi uko wawa uka wa ime.

²⁵Bambiko gu pai mi agunde be he kina ha naye ku ri re, gu pai dũ iriwoho ti re kina ha naye fere.

²⁶Mi asunga nga wenengaĩ te, mi zezeredi a te, baongoda ti re te, ono kina rungo naye.”