Read zande Eyobo 30 Bible Online

Eyobo 30 - zande bible

Eyobo 30

¹“Ono awere agu yo nga aparanga arengba nga garãyo na gimi ya, i nasa wia re, nga agu yo ka mi agindiga abayo ki moi yo na aango tipa banda gi rimbasa akandoro.

²Gini he ka mi u be he be yo, nga agu aboro omeyo naima bata?

³I ugudi be zingo ahe na ngbongi; i nari ugu sende be gu rungo nga ga onya na gbarasahe.

⁴I namo mukpo na kina ngua ha, atara ngua retama nga gayo nyake.

⁵I nado yo dagba aboro ku sa yo, i nata wawa fuo yo wa ti fuo iradĩ.

⁶I naraka rogo ngboongboo bafu ime yo, rogo due du rogo kpotosende na rogo siambia yo.

⁷I nakpara gbuku yo; ku tii akiwe yo dungura yo tiyo ho ni wa sa.

⁸I nga mumungo aboro, wa awiri payapaya aboro; i ki do yo ringara yo.

⁹“Ono awere i sa re wa gayo ũbia, mi du wa ũumohe fu yo.

¹⁰I nasoga re, i naru ti re tuturũ; ka i aberã nga pa suka sure ku bangire yo ya.

¹¹Bambiko wa zaki Mbori gako gire ti re, ki niumbasi re, i naba pa zoga tiyo bara bangire ku sa yo.

¹²Ruguzuruguzu aboro narunda ku kumbabere yo, i naturã re ku mbata yo, i naba gayo apai kuti re nga pa gbarasahe.

¹³I nagbarasa pa gi gene, i nakiisa pa gi gberãngbi; boro ho naza yo te.

¹⁴I naye sa re rogo sapusapu rago, dagba gu sapusapu he re, i naye yo ku ri re kindi.

¹⁵Agunde aye kuti re, i nadanda gi irisa wa yuge; gi pa du zezeredi susi ku sa yo wa dubo.

¹⁶“Torore uka rogo re yo awere; arame gberãngbi tiwi ku ri re.

¹⁷Yuru amemere ni kofokofo ho rogo re yo, na agu aima narunduka re si aongoda nga te.

¹⁸Gi kaza zi tihe kuti gi baukadi wa du he ni kere he, si tapa re kirikiri wa gorõ gi roko.

¹⁹Mbori ba re ku ndawa yo, mi sa tire wa nvutu na kuke.

²⁰Mi kpari foro, ka mo akaraga nga pai fere ya; mi ru ku ari, ono mo nabi re abi gbua.

²¹Mo asa tiro ka du fere wa kere boro; mo narungosi re na gu bakere ome du ti bero.

²²Mo natumba re ku ari ri yuge, mo namanga re mi oro ri he, mo ki niyeke re ri gugugu yuge.

²³Mi ini he ya mo ayé na mi sa kpio ni rengo, na ku rogo gu bambu i aringbisi he tipa unga aboro dunduko.

²⁴“Ono gu ni du ri guguda gbarasigbarasi ahe ni ataá nga beni, ki kpari rogo gani gbegberẽ pai, te?

²⁵Ati mi akpari tipa gu ni nadu ngba nyanyaki pai? ati torore arungo tipa gu ni nga irazingohe?

²⁶Ono ho mi angere ni tipa wenepai, kina gbigbitapai ki ye; ho mi asungudi imarago ni, kina bitimo ki ye.

²⁷Vure yo nasaka tihe, ka si aongoda nga ya; arame gberãngbi naye ku ri re.

²⁸Mi nandu na kpotore ni bisibisi he, be uru te; mi ru ku ari rogo gbuu yo, ki nikpari tipa undahe.

²⁹Mi wa wirina ahúwa, ki du wa badiata na bazire nga asurutio.

³⁰Kpotore du ni bi he, ki niurunge ti re, amemere ki nigbi be faarago.

³¹Si du gi sagiru nasa tiru ti ni ka kpara ni nunga, woro gi nambongo ki sa tihe ku ku rogo fugo agu yo nakpara ni aume.”