Read zande Eyobo 32 Bible Online

Eyobo 32 - zande bible

Eyobo 32

¹Si du agi akumba biata re ki mbu karagapai fu Eyobo, bambiko ko adu ni ruru boro bangiriko.

²Fuo gure ga Eriu zinga ki rungudi, nga wiri Barakere boro Buza, nga ngbatunga Rama. Ko azingi kuti Eyobo, bambiko ko ayugu pa tiko ni ruru boro ono Mbori te.

³Ko ki zingi a wo fu agu abadiangba Eyobo naadu biata, bambiko karagapai adu nga ngbayo te, zavura wa i asari ngbanga kuti Eyobo vurũ.

⁴Ono Eriu asunguda Eyobo ka fura na ko, bambiko i adu ni kuru aboro, ki susi ko.

⁵Ho Eriu abi he ni ya karagapai adu nga ngba agu akumba biata re te, ko ki zingi.

⁶Eriu wiri Barakere boro Buza ki karaga pai ki ya: “Mi nga paranga rogo garãre yo, ono oni nga gbinza aboro; si du mi aongo ti ni, ki gunde ti gumba gu pai dũ bangire.

⁷Mi aya, ‘Kina arame fúra nga, dungu agarã yúgu nga pa tatamana.’

⁸Ono toro du rogo boro yo, gu onga nga ga gu Ko du na tandu apai dũ, nafu rugatinapai fu ni.

⁹Si nga kina abaakumba du na tatamana te, a nga kina gbinza aboro rugu tiyo na ruru sarangbanga a te.

¹⁰Si du ya mi ti ni, ‘Oni dége turoni kono du mi ni; mi yúgu gu pai dũ bangire a.’

¹¹“Oni ngére, mi asungudi pa gaoni apai, mi aye ture tipa gia sangba roni, ho oni agbata pai ni ka gumba ha.

¹²Oni ngére, mi asungudi pa roni, ono oni ngére, ono boro adu nga ho ka yugo gopai fu Eyobo te, watadu karaga pai tipa gako apai dagba roni yo te.

¹³Oni bánda tironi oni ka ya, ‘Ani bi tatamana; ono kina Mbori nikadia be ko, boro te.’

¹⁴Eyobo ayugo nga gako pai nzunzu kuti re te, mi akáraga nga pai fu ko na gaoni apai te.

¹⁵“I nakiga akiga, ka i akaraga nga pai berewe ya; pai ngbayo ka i gumba ha wa sa te.

¹⁶Mi asúnguda yo, bambiko wa i afura nga ya, bambiko ru yo aru zaa, ka i akaraga nga kura pai ya?

¹⁷Mi nikagumba gi karagapai a, mi nikayugo gu pai dũ bangire.

¹⁸Bambiko dungu apai du ngbare, gu toro du rogo re yo nasoada re.

¹⁹Oni ngére, vure yo wa gu ime kakue adu nga ba kura ha ti ni ya; wa vovo mangu kpoto nambeda ka su.

²⁰Mi ka fura, si worokosi re; mi ka za ngbare ka karaga pai.

²¹Mi akpára nga pa aboro ki ngba na gu ni susi te, watadu gumba pai ni zomia gu boro sa te.

²²Bambiko mi aina nga ka gumba zomiapai te; Bamangire ka digisa re mbembedi.