Read zande Eyobo 33 Bible Online

Eyobo 33 - zande bible

Eyobo 33

¹“Ako Eyobo, mi nakpara foro, mo gí fugore, ki dege turo sa gimi apai dunduko.

²Mo ngére awere, mi za ngbare, mirãre vuru ngbare yo nafura.

³Gimi apai nikagumba pa ga kpotore yo rurupai, agu apai ini ngbare si mi agumba ha ni rengo.

⁴Ga Mbori toro mangi re, gu Ko du na tandu apai dũ, gako onga nafu unga fere.

⁵Mo káraga pai fere, ka mo rengbe na ni; mo tángara gamo apai ni rugurugu he bara bangire; mo rú nga tipa ha.

⁶Mo ngere, mi koyo du Mbori ni wa du mo koyo du Mbori ni a; i amangi re a kina rogo pere.

⁷Mo ngere, gunde re amanga nga ro mo gunde ti re te; gi sosodapai adu nga ri ro rõrõi a te.

⁸“Ni rengo mo nifura mi nigi he, mi ima gia woro pa gamo apai.

⁹Ya mo, ‘Mi du gigiri, zanga samungu; mi nga boro wenesa, irairapai rogo re yo wa sa te.

¹⁰Mo ngére, ko nagbata pai kuti re, ko gedi re wa vurako;

¹¹ko namaa ndure ku rogo angboro yo, ki nikparia pa gimi agene dunduko.’

¹²“Mo ngére, mi akáraga pai foro, bambiko rogo gi pai re mo adu nga ni ruru ro te. Mbori kii pako susi ga boro.

¹³Tipagine mo apaa ti ni na ko, niya, ‘Ko akáraga nga wiri pai fu boro wa sa te’?

¹⁴Bambiko Mbori nafura rogo ngba tunga pai sa, ii, na ue a, ono boro aina nga pa ha te.

¹⁵Rogo musumo yo, rogo yugu yuguhe yuru, ho bakere rame nizi aboro ni, i nira rame ri gayo ba,

¹⁶ko ki za tu aboro, ki niiriwosi yo na pa fugapai fu yb,

¹⁷ya ko aria boro ti ngba fuo gani pai, ki oko pa ruka be boro;

¹⁸kina ko nabanda mbisimoni be Due, na ungani be kpio basape.

¹⁹“Boro du ni mbusimbusi ni na ima ku auru gani ba, na nyenye ima rogo amemeni yo;

²⁰si du ni nasoga riahe ti ni, mbisimoni ki nisogobawene riahe a.

²¹Kpotoni ugudi dũ, ka i arengba nga ka bi he ya; amemeni i nabi nga ha ya, si kuru gbazagara.

²²Mbisimoni nambeda mbembedi na Due, na ungani koyo du agu yo ni naye na kpio.

²³Ka maraika du ho tipa ni, ni azarõ, boro sa dagba kutu yo, ka yugo gu pai fu boro ru tipa ni;

²⁴ki niini pai fu ni, ki ya, ‘Mo bátasi ni be ti ku Due yo, bambiko mi bi motumo;

²⁵kpotoni zámbua berewe wa ga parangani; si du wa ga agu arame nga ga parangani’;

²⁶si du boro akpára fu Mbori, ko ki idi pa ni; ni narima ku bara bangiriko na ngbarago. Ko ki karaga gani rurupai fu aboro,

²⁷ni nabi bia ku bangiri aboro, niya ‘Mi ingi pai, ki irasi pa gu naadu ni ruru he, ka si au nga fere ya.

²⁸Ko atumo mbisimore ti ndu ku Due yo, ungare abí imarago.’

²⁹“Mo ngére, agi apai dunduko re Mbori namanga ha, bara ue, ii, bara biata, fu boro,

³⁰ka kusa mbisimoni Due yo, rago há fu ni be gu imarago nga ga unga.

³¹Ako Eyobo, mo gi nga ha wenengaĩ, mo dége turo fere; mo óngo kii, mi afúra.

³²Ka mo du na pai ngbaro ka gumba ha, mo káraga pai fere; mo fúra bambiko mi nakpi nyemu ka dia pai ri ro.

³³Ka si adu nga wo ya, mo dége turo kono du mi ni; mo óngo kii, mi ayugo pa tatamana foro.”