Read zande Eyobo 36 Bible Online

Eyobo 36 - zande bible

Eyobo 36

¹Eriu ki nigumba apai ki niya:

²“Mo íni pai fere toni, mi ayúgo pai foro, bambiko mi du na pai ngbare kindi ka gumba ha tipa Mbori.

³Mi ayé na gi tatamana tuturũ, mi ayá rurupai du be Bamangire.

⁴Bambiko ni rengo gimi gumbapai adu nga ni zire te, gu boro du ni ziazia ni rogo inahe yo ni du na mo.

⁵“Mo ngére, Mbori nga iranyaka, ko agindiga nga boro wa sa te; ko nga iranyaka rogo tandu rugatinapai.

⁶Ko abanda nga gbegberẽ aboro ni ungayo te, ono ko nafu gu he rengbe tipa rungorungo aboro ru pa ha fu yo.

⁷Ko nadia nga bangiriko ti ruru aboro te, ono tipa abakindo du auru mbatabakindo ko namaa yo nye anye kindi, i ki du ni kiisikiisi pa yo.

⁸Ka i du ni vodivodi yo ni azogbo, ni zizi yo be giri gberãngbi,

⁹ko ki yugu gayo mangapai fu yo, na pa gayo samungu, ya i namanga pai ni kina ruka.

¹⁰Ko naza tuyo a tipa rugute, ki rugu yo i káraga tiyo pati irairapai yo.

¹¹Ka i dege tuyo ki nimangi pa ko, i adígisa gayo arame rogo wenepia, na gayo agarã kina rogo pa ngbarago.

¹²Ono ka i adega nga tuyo ya, i anyasa be basape, ki kpiki zanga inahe.

¹³“Azangasinombori ku kpotoyo yo nadungura zinga ku ri yo; i akpara nga tipa undahe ho ko navoda yo ni te.

¹⁴I nakpika ni kina parangayo, ungayo anyasa dagba sino airabari akumba.

¹⁵Ko nabatasa rungorungo aboro rogo gayo rungo, ki niza tuyo rogo gayo rungosi.

¹⁶Ko arima ro a rogo imisiripai, ki ndu na mo ku rogo kikii rago, yo adu nga ima ni ya. Agu ahe i amoi ku ri ga mbisa adu na nzeme gbe.

¹⁷“Ono mo ahi be sarangbanga ku ri gbegberẽ aboro; sarangbanga na rurungbanga zi ro.

¹⁸Mo bánda tiro zinga ka ndu na mo ku rogo pa ũmohe; ka pa kia motumo sá nga ro ku bani ya.

¹⁹Gamo aũkumuko rengbe ka banda ro be rungosi watadu tandu ga ome dunduko?

²⁰Ka mo kpí nga nyemu yuru ho i nirogo aboro ni ku sa yo rogo gayo aba ya.

²¹Mo bánda tiro, ka mo sá nga tiro sa irairapai ya, bambiko mo sia gure susi gberãngbi.

²²Mo ngére, Mbori du ni kiisikiisi pa ko rogo gako tandu; da du nga ni bayugupai wa ko?

²³Da narugu gako apai fu ko, watadu da rengbe ka ya, ‘Mo mangi irairapai’?

²⁴“Mo tingidi pa kiisa gako manga pai, nga gu aboro nabi bia tipa ha.

²⁵Aboro dunduko bi he; aboro nabi he abi tuturũ.

²⁶Mo ngére, Mbori du ni Bahe, ono ani aina nga ko te. Ka i gedi nga agarãko te.

²⁷Bambiko ko ninagbeda ndomo ku ari yo, nga gu natoga ni mai be utura ha;

²⁸nga gu ngbangbaturũ nauka ku sende no, si ki nitotogo ku auru aboro kpaima.

²⁹Gini boro rengbe ka ruga tini na kparakakparaka rogo adubo, na woro sumba gumba rogo gako basura?

³⁰Mo ngére, ko nagbandaka gako ikpira gumba pati ko kirikiri, ki dadi mburu abaime.

³¹Bambiko rogo agi apai re ko nasara ngbanga aboro, ko nafu riahe kpaima.

³²Ko nadada beko na ikpira gumba, ki rugu he si zi gu fuo he.

³³Woroho nagumba pai tipa ko, ya ko du na deringo na zinga kuti irairapai.”