Read zande Eyobo 37 Bible Online

Eyobo 37 - zande bible

Eyobo 37

¹“Be gi pai re a kpotore yo nakio, ki nigbisi rogo gu ba ha.

²Oni dége turoni sa sumba fugoko, na gu puma nakura ngbako yo.

³Ko nakeda ha ku tii ngbangbaturũ no dunduko, gako ikpira gumba ki da kuti digida kpotosende.

⁴Fuo ho fugoko ki nipazua; ko nasumba na fugo gako taarimo, ko ambu nga ha ho i nigi fugoko ni te.

⁵Mbori nasumba na gako fugo ni iiriwo ho, ko namanga baiiriwo apai, nga gu ani arengba nga ka ruga tirani na ni ya.

⁶Bambiko ko nagumba pai fu morogumba, niya, ‘Mo tí ku auru kpotosende’; kina wo fu mikomiko mai na nana mai, ‘Oni dú nyanyaki.’

⁷Ko nakisa be aboro dunduko; ya aboro dunduko ko amangi yo i ini pa ha.

⁸Anya ki gbu ku rogo gaami bagbuko, ki sungu rogo gaami asima.

⁹Bayuge naye sudiyo, zere ki niye nodiyo.

¹⁰Onga Mbori nafu zerarago, bakindigi aime ki nikputa.

¹¹Ko namaa tindiro du tomotomo ku rogo nanaga mai yo; adubo nakparaka gako ikpira gumba tuturũ.

¹²Ikpira gumba ki nioro be gako rugahe, ka manga kina gu pai ko aruga ha fu he, ku auru kpotosende yo aboro naraka ni.

¹³Watadu du he tipa rugapai, watadu tipa gako ringara, watadu tipa weneringise, kina ko naya si mangi.

¹⁴“Ako Eyobo, mo gí nga gere, mo rú nga zaa, ka berã nga pa gu iiriwo mangaapai nga ga Mbori.

¹⁵Mo ini pa waĩ Mbori naruga ha fu he, ki mangi ikpira gumba si kĩ rogo mai?

¹⁶Mo ini pa ringbisa ba amai ari yo, nga gu iiriwo mangaapai nga ga gu ko du ziazia rogo inahe,

¹⁷mo gu du gamo aroko ni fafoi he, ho ru kpotosende ni zaa be gu yuge naye sudiyo?

¹⁸Mo rengbe nazaraga angbangbaturũ wa ko, du nyanyaki wa zaragasizaragasi ngana?

¹⁹Mo yúgu gu pai ani ka gumba ha fu ko; bambiko ani arengba nga ka ruga fugorani be bitimo te.

²⁰Si rengbe i ya fu ko mi nakpi nyemu ka gumba pai? Boro akpi nyemu gu pai mbata nga, i mbiri ni ambira dũ?

²¹“Awere aboro arengba nga ka ngera koyo du gu imaima imarago ni ho si nahasa rago ni ari yo te, ho yuge naya ni, ki tura ha ku sa yo.

²²Nodiyo imaima he naye ni nakĩ wa dahabu, Mbori ukadi tiko na iiriwo taarimo.

²³Gu Ko du na tandu apai dũ ― ani arengba nga ka bi ko te; ko du na bakere tandu na ruru sarangbanga, ko airasi nga sarangbanga du na rurupai ni ngenge he te.

²⁴Si du aboro nagunde ti ko ti ni; ko aberã nga pa gu boro na berã pai ku kpotoni yo ya ni du na tatamana te.”