Read zande Eyobo 38 Bible Online

Eyobo 38 - zande bible

Eyobo 38

¹Si du Yekova ki karaga pai fu Eyobo rogo bakamikami yuge yo, ki ya:

²“Da nga gi ni re naoka rondo na agu apai zanga inahe?

³Mo vódi nga tiro awere wa kumba; bambiko mi asána ro, mo ki taki pande pai fere.

⁴“Wari mo adu ni ni gu rago mi amoi mburu kpotosende? Mo gúmba ha fere, ka mo du na rugatinapai.

⁵Da naringbisi bakiaha―ati mo ini he, te! watadu gini boro nataĩ gire ri he?

⁶I amoi amburu he ku auru gine, da namoi mbia tukpu he?

⁷ni gu rago ho akerekuru ngbawiso abi bia ni wa sa, awiri Mbori dunduko ki ningbiko ni ngbarago.

⁸“Da nakisi abaime na angbadimoho, ho si agbadi ni, wa ka si kuru rukumbu yo?

⁹ho mi amoi dubo ni ni gaha roko, na nanaga bitimo ni gaha gbanga tambara tipa ha,

¹⁰ki ringbisi bangbandarago tipa ha, ki moi angbongboho na angbadimoho,

¹¹ki ya, ‘Kono mo ka ye ku ho ni, ono ku mbata yo te, kina eré ngambi ga ruka ka nye ni’.

¹²“Mo arugu wiso wa ga rame atona, ki yugu pai fu ngbatutu si ini ba ha?

¹³ya si da ti digida kpotosende, ka zigizo gbegberẽ aboro rogo?

¹⁴Si sa tihe wa pere tii dikadika ha yo; ahe dunduko ki ru wa roko.

¹⁵I ki si imarago be gbegberẽ aboro, gu be tumba yo ku ari si kuadi.

¹⁶“Mo arimi ku rogo gugaabi yo nga ga baime? Watadu mo ata ku rogo dudungura rago yo?

¹⁷Ngbadimo kpio du ni kusikusi he foro? Watadu mo abi ba angbadimo nduunduu bitimo?

¹⁸Mo rugu tiro na pa waĩ du bakia kpotosende? Mo péke nga ha, ka mo ini pa agi apai re dunduko.

¹⁹“Wari du gene ni koyo imarago naraka ni? na wari du ba bitimo ni,

²⁰ya mo ndu na ni dati kina digida ha, ki ini pa agene koyo du gaha bambu ni?

²¹Kangu ti ni te, mo ini he, bambiko yo i avungu ro ni, gedigedi gamo arame ni badungu he!

²²“Mo arimi ku rogo ga nana pusi mai baiga ũkumuko yo, watadu mo ini gu baiga ũkumuko nga ga morogumba?

²³gu mi nabanda tipa rago fudifudipai, tipa gu uru nga ga vura na sovura.

²⁴Wari du gu gene ni yo imarago nakparaka ni? wari du gu ba yo yuge uroyo nakparaka ni ku auru kpotosende?

²⁵“Da nasari gene fu fufu mai, na gene fu ikpiragumba?

²⁶ka ye na mai ku rogo gu ringara adu nga aboro ni ya, na ku rogo gu ngbakungba adu nga aboro ni ya;

²⁷ka ungasi ngbakungba na bate; ka manga sende si kusi nvuo.

²⁸“Bavungu mai ti ni? na da navungu togotogo ndomo?

²⁹Rukumbu da yo zerarago aye ni? Na gu dododo kputakputa pusi mai nga ga ngbangbaturũ, da nabatika ha?

³⁰Aime sa tihe nyanyaki wa mbia, bangiri ngirimo ki kputa wa morogumba.

³¹“Mo rengbe ka vo badona agu akerekuru nga Periade, watadu ka zaka gire ti Oriona?

³²Mo rengbe ka kusa aMazarota ti regbo ra? Mo rengbe ka gasa Urisi na awiru?

³³Mo ini agu andika nga ga angbangbaturũ? Mo rengbe ka mbakada gu zogarago du yo wo auru kpotosende no?

³⁴“Mo rengbe na tumba fugoro si da ku amai yo, bafufu mai wandia ku ri ro?

³⁵Mo rengbe ka keda aikpira gumba, ya si ndu, si ki ya foro, ‘Ani du re’?

³⁶Da namoi tatamana ku rogo adubo? watadu da nafu rugatinapai ku rogo ndomo yo?

³⁷Da rengbe ka geda amai be gani tatamana? Watadu da rengbe ka uka mai rogo agu amanguhe du ngbangbaturũ yo,

³⁸ho nvutu nata guta ha ni, aunduhe ki me tihe wa sa nyanyaki.

³⁹“Mo rengbe ka gbata pasio fu nabahu? watadu mbisa ga paranga abahu gomoro,

⁴⁰ho ami nipiki ni rogo gaami asima, watadu ka sunguda anya rogo gaami bagbuko?

⁴¹da ninafu riahe tipa akoya, ho awira nakpara ni fu Mbori, ki nita tipa zingo riahe?”