Read zande Eyobo 39 Bible Online

Eyobo 39 - zande bible

Eyobo 39

¹“Mo ini pa gu rago ameme mbia nuvunga ti ni? Mo rengbe ka kparia pa gu rago unuungbiimo navunga awira ti ni?

²Mo rengbe ka geda agu adiwi gaami rago vunga nadiga ti ni? mo ini pa gu rago ami navunga ti ni,

³ho ami nanugadi ni, ka vunga awira? Ami ki bati be ima.

⁴Awira nanyaka, ki nisono haurago yo; ami nandu, ka ami akaraga nga tira fuo anara berewe ya.

⁵“Da kedi adongi nvuo ami nita ni sa ra? Da zaki gire ti miipi adongi nvuo

⁶nga agu ra mi atu ngbakungba fu ra ni gaami rago, na ndõo ni gaami baraka?

⁷Ami napayasi pa gu gbarakagbaraka pai nga ga bakporo, ami agia nga gu tatangba nga ga barugu pa sunge a te.

⁸Ri abaagangara yo du gaami banambu ni, ami nagbata iwo ahe dunduko.

⁹“Ka gbeẽ du na ngbarago ka manga pa ro? U asúnga pati ga gamo anya sanduki riahe yuru?

¹⁰Mo rengbe ka vo ru na gire ku due bino yo, watadu u abúkia sende ngboongboorago ngba fuo ro?

¹¹Mo akída kuti ru, bambiko u du na bakere ome ki mbu ga sunge ku be ru?

¹²Mo ini he, ya u ayega na ga tunga ku kporo no, ki dungura ga zende ahe ku baigita ahe yo?

¹³“Wa pupo surutio nado bukebuke; puporu na sueru na nyemuse ti ni?

¹⁴Bambiko u mbu apararu ri sende, si foi be nvutu sende,

¹⁵bangiriru ki go ti gu pai nga ndue asi he, watadu anya nvuo asumbusa ha.

¹⁶U nazinga kuti awiru, wa du nga ami wa awiru te; ka gau sunge vura du gbua vuru, u agunde nga te;

¹⁷bambiko Mbori mangi ru bangiriru go ti tatamana, ko afu nga rugatinapai fu ru a te.

¹⁸Ni gu rago u naguari sa oto, u napayasi pa farasi na banduriru a.

¹⁹“Mo nafu ga farasi tandu fu ru? Mo naukadi goru na mange nzangbaru?

²⁰Mo nasa ru u gu wa yere? Iriwo gbokororu du ni kere he.

²¹U nade sende ngboongboorago yo ni sukuturu, ki ningi be omeru; u nakura ka gbia aũvura.

²²U namoma gunde amoma, ka u akio nga ya; u asa nga tiru ku sa yo be basape te.

²³Kpokoro nawo awo pavuru, baso nakĩ na andigba imaima.

²⁴U nambira sende be gau nzengerenzengere erã; u arengba nga ka ru zaa ti woro nambongo te.

²⁵Ho nambongo apaa ni u naya, ‘Ha, ha!’ U nagia fuõ vura tuturũ, gu woro sumba gumba nga ga abarutirivura, na tatangba a.

²⁶“Bakiki nayanga be ga tatamana, ki nizaraga puporu ku sudiyo?

²⁷Dingimo nagu ku ari yo kuti ga rugapai, ki dua bamburu ku ari yo gbe?

²⁸U naraka ri mbia yo, yo du bamburu ni, kuti ngbaho mbia yo rogo nyanyaki ba.

²⁹Yo u namaa rago ni tipa nya ka zia ru; bangiriru nabi he tuturũ ku sa yo.

³⁰Awiru nanyora kina kure a; yo du akangba ni, yo du u ni a.”