Read zande Eyobo 4 Bible Online

Eyobo 4 - zande bible

Eyobo 4

¹Erifaza boro Temana, ki karaga ha fu Eyobo ki ya:

²“Ka boro tona ka fura na mo, si agberã ti ro? Ono da ka mbu fugo?

³Mo ngere, mo arugu dungu aboro. Mo anyakasi rurungbura aboro.

⁴Gu pai mo agumba anyakasi gu boro naati, mo anyakasi rukusu rurungbura boro,

⁵Ono awere wa pai nada ti ro, he namaka ro; si zi ro, mo ni fudifudi ro.

⁶A nga ga gunde ti Mbori nga ũsongoda ro te? a nga ga maabangirise nga ga yososopai a te?

⁷“Mo bérẽ nga ha, da nakpi nangia boro wenesa? watadu wari i aba ruru aboro ku ho ni?

⁸Wa bi mi he tigimi, agu yo nasopa bino irairapai, ki nirũ fudifudipai, i nake kina ha.

⁹I nakpi be ga Mbori onga, i nanyasa be kina woro gako zinga.

¹⁰Gbunga bahu, na paa zingizingi bahu, na rindi paranga abahu kuadi dunduko.

¹¹Nyanyaki bahu kpi be zingo riahe, awiri abahu gbandaka tuturũ.

¹²“Pai ye awere fere ni rondo, mi agi pai ni ture rogo patapata.

¹³Rogo gu berá naye musumo yo uru, ho bakere rame nizi aboro ni,

¹⁴gunde ki zi re, mi ki kio, nga gu nawo awo ti amemere dunduko.

¹⁵Toro ki susi bara bangire; mange kpotore ki ru ku ari.

¹⁶Toro ki ru zaa, ono ka mi arengba nga ka ina pa ha ya. Kpiahe ki du bangire, ono rago ki ongo kii, mi ki gi fugo naya:

¹⁷‘Gu boroboro nakpí akpi, ni rengbe ka du ni ruru ni bara bangiri Mbori? ka boro du ni gigiri ni bara bangiri Bamangi ni?

¹⁸Wa ko akida nga kuti gako moyambu ya, ko ki ya gako amaraika namanga pai ni mungo;

¹⁹waĩ susi pa agu aboro naraka tii bambu pere, du mburu gayo apai nvutu yo, nga agu yo mburu kpotoyo wa kina ga gbaru.

²⁰I nyasi bangbanda wiso na nyemu; i kpiki nye anye kindi zanga berá pa yo.

²¹Ka i mofo giri gayo bamburoko i kpi nga te, zanga tatamana?’ ”