Read zande Eyobo 40 Bible Online

Eyobo 40 - zande bible

Eyobo 40

¹Yekova ki gumba pai fu Eyobo berewe, ki ya:

²“Gu ni nga basakipai ka ni darĩ kangu na gu Ko du na tandu apai dũ? Gu ni nati kangu na Mbori, ni karaga pai.”

³Eyobo ki karaga pai fu Yekova, ki ya:

⁴“Mo ngere, kii nga gimi apai te; gini pai mi ka karaga foro? Mi moi bere ti kina ngbare.

⁵Mi fura bara sa, ka mi akáraga nga pai berewe ya; bara ue a, ono mi andu nga na ni ku mbata yo berewe te.”

⁶Fuo gure Yekova ki karaga pai fu Eyobo rogo bakamikami yuge yo, ki ya:

⁷“Mo vódi tiro awere wa kumba; mi asána ro tipa pai, mo táki pande he fere.

⁸Mo ayá ru nga gi sarangbanga te? Mo akíta ngbanga re, i di pai ri ro?

⁹Be ti ro wa ga Mbori, mo rengbe ka sumba na fugo wa gako?

¹⁰“Mo fóngo tiro awere na taarimo na kiapase; mo úkadi tiro na irisa na wene ngbanya.

¹¹Mo úka ga zinga buza, ki ngere ku ri agu yo dunduko nga aboro ruka, ki payasi yo.

¹²Mo ngére ka bi agu yo dunduko nga aboro ruka, ki umbasi yo; ki simbi gbegberẽ aboro ku sande ho rundu yo ni.

¹³Mo óko yo dunduko ku nvutu yo wa sa; mo vó kpakpuyo ku rogo okooko ba.

¹⁴Si du mi aída ha foro a, ya kumbabero rengbe ka fu diabese foro.

¹⁵“Mo ngére awere ki bi nga dupo, mi amangi ru wa mi amangi ro; u nari nvuo wa kina babagara.

¹⁶Mo bí nga, omeru du ti kina dimoru, omeru ki du ti gbaga vuru;

¹⁷u nanyakasa saru wa ngua kedara, agbaga ambosoru ki zungudi tihe wa sa.

¹⁸Rogo amemeru yo du wa yaro sirigi, aberu na anduru ki du wa ngbongbo mara.

¹⁹“U nga bakumba he dagba agu ahe Mbori amangi; kina gu ko namangi ru rengbe gako baso ka mbeda na u!

²⁰Abaagangara nakusa riahe fu ru, yo anya nvuo dunduko nangi ni.

²¹U napi tii nzereme ngua yo, rogo gu bagbuko nga ga bire nganzi, na rogo ndawa.

²²Angua dadi ru na nzeremehe; asarizi nga angua du pangba di du pati ru kirikiri.

²³Mo ngére, ka di afu buza, u akio nga te. U ki du zukazuka ka Yaradene vura fu kuti ngbaru vuru.

²⁴Boro rengbe ka zia ru ho u nangereka ni, watadu ka kora õru na kombe?”