Read zande Eyobo 41 Bible Online

Eyobo 41 - zande bible

Eyobo 41

¹“Mo rengbe ka gbe ngondi na kombe, watadu ka vo mirãru na gire?

²Mo rengbe ka maa gire ku õru yo, watadu ka kora biringa ngbaru ku vuru he yo na kombe?

³U asárawa tiru foro tipa dungu apai? U agumba zezeredi apai foro?

⁴U amánga kidohe na mo, ya mo di ru ni ga moyambu nye anye kindi?

⁵Mo azóga mbaro na u wa mo nazoga mbaro na zire? watadu mo avó ru na gire tipa gamo adegude?

⁶Gu rika nga ga abaziatĩo nikabaga ru? I akpáraka ru fu ababagiahe?

⁷Mo rengbe ka maa nzekenzeke amarã ku rogo kpotoru dunduko, watadu baso soatĩo ti riru?

⁸Ka mo moi bero ku ri ru, mo berẽ pa vura, bambiko mo amánga nga ha berewe te!

⁹Mo ngére, ga boro maabangirise tipa ru arengba nga te; ni umbasi tini ho bi ni ru ni.

¹⁰A nga boro ho sa ngarã ka era ka wo ti ru te. Da tie rengbe ka ru bara bangire?

¹¹Da nafu he fere mbata, ya mi karaga kura he fu ni berewe? Agu ahe du tii ngbangbaturũ yo dunduko kina gimi du.

¹²“Mi aonga nga tipa pa anduru na aberu te, na tipa pa bakere omeru na pa wene kpotoru a te.

¹³Da rengbe ka yuka kpotoru ti ru? Da rengbe ka mbeda ku pati ngbaru?

¹⁴Da rengbe ka za ngbaru? Rindiru kirikiri nga ũgunde.

¹⁵Gu nyanyaki ire du ti kpotoru du wa ũrekangose, si ni kisikisi he kpikpikpi.

¹⁶Gu kina ri kura ha, ka yuge arengba nga ka ya dagba ha ya.

¹⁷Si ni kpamiakpamia ha kpikpikpi kuti kura ha, dika ha tihe kina sa, ka i arengba nga ka kpara ha ya.

¹⁸Gau mozika na ikpira wa imarago, bangiriru ki nikĩ wa ho rago nagira ni.

¹⁹Ngbaru yo wiri awe nakura ni, nzerewe ki nigbadi yo.

²⁰Ngime nakura õru yo, wa baba ime rogo akoro na wa gbitiri gai.

²¹Ongaru narunguda kingiriwe, mirãwe ki nikuru ngbaru yo.

²²Ome ki nye goru yo, gunde ki nido gbere barangba ru.

²³Wiri apasioru nadika tihe kina sa, si dika tihe kuti ru nyanyaki, ka i wo nga ti ni te.

²⁴Ngbaduru yo du nyanyaki wa mbia; nyanyaki wa mbia saahe.

²⁵Ho u niguari ni ku ari, airaome ki nigunde; i ki du wa kina aboro nzanga be bakere kiga.

²⁶Ka boro vura so vura na u na basape, si adía nga be ru te; baso a te, guanza na andigba a te.

²⁷U nageda marã wa kazi moru, sirigi wa kina kurukokuruko ngua.

²⁸Ka u oro nga be gunde aguanza te; ambia barioko sa tihe wa kina kakarika.

²⁹Ngbondo bangiriru wa kina kakarika; u namoma kuti woro andigba.

³⁰Tii vuru du wa tĩtĩ kpakawira; u nakpe fuo ru dogoro yo wa bakere mãra taka ahe.

³¹U namanga ngirimo si ba wa ime akoro yo; u nasa abaime wa wene fuõ nzeme.

³²Ngiri ime ti fuo ru yo nakĩ akĩ; boro aberá pa ngirimo ya si ni pusi he be imaha.

³³A nga kura nya ho ri kpotosende wa u te, nga gu ru zanga gunde.

³⁴U nabi agu ahe dunduko du ku ari; u nga bakindo ku ri awiri airaruka dunduko.”