Read zande Eyobo 42 Bible Online

Eyobo 42 - zande bible

Eyobo 42

¹Eyobo ki karaga pai fu Yekova, ki ya:

²“Mi ini he ni rengo ya mo rengbe ka manga apai dunduko, a nga pai ho mo aberã pa manga ha, ka i dingisa ha te.

³‘Da nga gi ni re naoka rugapai zanga inahe?’ Si du mi agumba gu pai mi aruga nga tire na ni ya, nga agu apai du ni baiiriwo ho fere, nga gu mi aina nga pa ha ya.

⁴‘Mo gí he, mi nikagumba pai; mi asána ro, mo ki taki pande he fere.’

⁵Mi agi pa ro be kina gu giapai nga ga tue; ono awere bangire nabi ro;

⁶si du mi payasi tire ki sa gi berã rogo nvutu na kuke yo.”

⁷Wo si adu, fuo gumba Yekova agi apai re fu Eyobo, Yekova ki ya fu Erifaza boro Temana, “Gi zinga rungudi kuti ro, na kuti agu abadiangbaro ue; bambiko oni agumba nga gu pai tipa re naru te, wa gi moyambu nga Eyobo agumba ha.

⁸Awere si du, oni rogo abaabagara saba na abaakandoro saba, ki ndu koyo du gi moyambu ni nga Eyobo, ki tumo ni zozo motumo tipa roni. Gi moyambu nga Eyobo akpára tipa roni; bambiko kina ko mi ka ida pa gako kparakpe ti ni, ka mi amánga nga roni kuti gaoni pa mungo ya; bambiko oni agumba nga gu pai tipa re naru te, wa gi moyambu nga Eyobo agumba ha.”

⁹Si du Erifaza boro Temana na Biridada boro Sua gbia kuti Sofara boro Nama ki ndu, ki mangi a wa Yekova arugu yo na ni. Yekova ki idi pa ga Eyobo kparakpe.

¹⁰Yekova ki karaga ga Eyobo ahe dunduko, ho ko akpari ni tipa abadiangbako. Yekova ki fu ahe fu Eyobo ni bakere he wa bara ue susi gu naadu be ko mbata.

¹¹Awirinako ki ndu koyo du ko ni, na adawiriko dunduko, na agu yo dunduko naainidi ko mbata. I ki niri riahe na ko kpuko yo. I ki nikpari kuti ko ni nunga, ki ningarãsi ko tipa gu gbigbitaapai dunduko Yekova aye na ni ku ri ko. Aboro ni ba sa sa afu bete marã fu ko, na atongo dahabu.

¹²Yekova afu maku fu Eyobo ti kusa rago susi gu naadu mbata. Ko adu na akandoro be ko wa 14,000, na akameri wa 6,000, na abaabagara vodi yo ra ni ba ue ue wa 1,000, na anaadongi wa 1,000.

¹³Ko ki du na awiriko nga akumba saba na ade biata.

¹⁴Ko ki yambu rimo bambata ri nga Yemima; rimo ue ri ki ngia Kezia, rimo biata ri ki ngia Kerene-apuka.

¹⁵Ono rogo gu ringara re dunduko i abi nga ade yo nangbaki wa agu awiri Eyobo re te. Bayo ki fu ukumbo fu yo a dagba akawiriyo.

¹⁶Fuo gere Eyobo ki raki wa agarã 140 ki bi awiriko na atitako wa rikayo kina biama.

¹⁷Eyobo ki kpi, ki du ni gbinza ko, gako arame ki nyasi nzunzu.