Read zande Eyobo 5 Bible Online

Eyobo 5 - zande bible

Eyobo 5

¹“Awere mo yambu nga he tie, boro ho nikakaraga pai foro! Mo asá tiro fu gini ziazia yo?

²Bambiko zingisapai naimo mumungo boro aimo. Kpihe naimo taataa boro aimo.

³Mi bi mumungo boro ni nimbakadi ba ni, ono ni ba sa mi ki tona ka tiwa gani kporo.

⁴Turũ awirini aturã na pa zereda, i gbingbida yo kuti ngbadimo bakporo, boro ho sa ka batasi yo te.

⁵Aboro gomoro riti gayo aũati, ki rogo agu ahe kuru dagba akiwe yo; aboro gomoro ime ki nyasi gayo ahe.

⁶Bambiko rungosiro aye nga nvutu yo te, gberãngo akura nga sende yo a te;

⁷ono i avungu boro tipa kina rungo, wa nzerewe nagu ku ari.

⁸“Ono tipa re tigimi, mi nakpi nyemu ka gbata Mbori, mi nakpi nyemu ka mbu gi pai ku be Mbori;

⁹nga gu ko namanga bakere apai ka i aruga nga tise na ni ya, si nga baiiriwo mangaapai gasi ba geda ha:

¹⁰ko nafu mai ku ri kpotosende, ki nikedi mai ku ri aati;

¹¹ko natumba agu yo ku ari du ni payapaya yo, agu yo nakpara kpenunga ko tumba yo ku ari tipa zereda.

¹²Ko mungosi gu sangaapai nga ga airabiriki, ka i arengba nga na manga gu pai berẽ yo pa ha ya.

¹³Ko nazia airatatamana kina rogo gayo birĩ; ki digisi gu rugapai nga ga airabiriki ni ba sa.

¹⁴I gbia tiyo na bitimo kina uru, ki nitataraga bebere uru wa kina yuru.

¹⁵Ono ko nabatasa awirinyaure ngbayo yo, na airazingohe be airazuu.

¹⁶Si du rurungbura boro adu na maabangirise ti ni, irairapai ki ru.

¹⁷“Mo ngére, ngbarago du fu gu boro Mbori naza ni, si du ka mo gíndiga nga gu rugapai nga ga gu Ko du na tandu apai dũ ya.

¹⁸Ko nahoga boro, ono kina ko navo ni; ko nata boro, kina beko ki wiisi ni.

¹⁹Ko abátasa ro be arungo sita; ii, rogo saba ha a, gbigbitapai azáda nga ro te.

²⁰Ti rago ngbongi ko abátasa ro be kpio, ti rago sovura ko abátasa ro be ome basape.

²¹Ko aóka ro be gbegberẽ fugo aboro, mo agúnde nga be gbarasapai ho si ka ye ni te.

²²Ti rago gbarasapai na ngbongi mo amóma amoma, mo agunde nga be anye kpotosende a te.

²³Bambiko kpamiatise adu dagba ro na ambia ati, anya nvuo ki zanga gunde be ro.

²⁴Mo aína ha ya ga bamburoko du ni bandabanda ha, mo andú ka bi ga ndugu anya, mo abi nga gu ru sa ingi te.

²⁵Mo aína ha ya atitaro nikadu ni badungu yo, gamo avungu adú wa kina nvuo ti kpotosende.

²⁶Mo agá ku rogo rpurã ti kina rago gbinza ro gbe, wa kina vodivodi zende ahe ti regbo ta ha.

²⁷Mo ngere, ani agbata gi pai re, kina rengo nga ha. Mo gí he, ki ini pa ha, si unda ro.”