Read zande Eyobo 6 Bible Online

Eyobo 6 - zande bible

Eyobo 6

¹Eyobo ki karaga pai ki ya:

²“Ako, ka i ringbisi pa barõa gi fudifudipai, gi rungo ki du auru ũringbisaahe yo dunduko!

³I ki bi he si rõi ki susi ngume baime; si du du fugore ti ni ni aura.

⁴Bambiko agu aguanza nga ga gu Ko du na tandu apai dũ, du rogo re yo; gu kere ngua du ti ra si torore ambira; ga Mbori baiiriwopai natangara tihe kuti re.

⁵Dongi nvuo napaa ho u nari nvuo ni? watadu babagara nagbunga ho u nari he ni?

⁶Ka i ri gu he adu nga na ngbanya ha ti ni ya, zanga tikpo? watadu ngbanya ti pusi parakondo ngba yo?

⁷Nyemu ri he du nga ti re te; si fere wa kina gbegberẽ riahe.

⁸“Ako, ka mi abi gu pai mi asana he tipa ha, ka Mbori idi gu pai fere mi akpi nyemu he;

⁹ka si angba ti Mbori ko imi re aimo, ka ko taĩ beko, ki ba re ku sa yo!

¹⁰Si ka mi awasa ti ni; ki nipanda be gu kaza anyasa nga ya; bambiko mi ati nga kangu agu apai nga ga gu Ko du ni Ziazia Ko te.

¹¹Gini he nga gi tandu, ka mi sungudi pai? Digida gi pai nga gini he, ka mi hi pai?

¹²Tandu ti re wa ga ambia? watadu du pasiore wa sirigi?

¹³I bi undahe rogo re yo? ati mburu undahe guari ti re?

¹⁴“Gu ni naka na inapai fu kura ni nambu pa gunde ti gu Ko du na tandu apai dũ.

¹⁵Awirinami mangi biriki wa baome ime, wa kina gu gene wiri adi ninaima nga ya,

¹⁶du na bitimo be bazere, yo morogumba naoka tihe ku ho ni.

¹⁷Ti rago faarago, si ki ugudi, ho rago nafaa ni, si ki gundu rogo gu ba ha.

¹⁸Aboro nunguro ki aria tiyo ti gayo gene; ki mere ku ngbakungba yo ki kpiki.

¹⁹Aboro nunguro nga ga Tema ki ngereke, nungunungu aboro nga ga Seba ki du na maabangirise.

²⁰Ono i adu na gberãrago bambiko wa i adu na maabangirise; i ndu koyo ono ka i aina nga gu pai i ka manga ha ya.

²¹Wo du oni fere awere; oni bi gi gberãngbi, oni ki gunde.

²²Ya mi, ‘Oni fú gamahe fere’? watadu, ‘Oni fú he fere dagba gaoni ahe’?

²³watadu, ‘Oni bátasi re be vurare’? watadu, ‘Oni túmo re be abarugosi re’?

²⁴“Oni yugu pai fere, mi ki ongo kii; oni ki yúgu gu pai fere mi aingi ti ni.

²⁵Na nyaki fugo ruru apai! Gini pai gaoni zapai aruga?

²⁶Oni beré he ya oni rengbe na ruga afugo, wa du fugo gu ni zanga maabangirise nga kina yuge?

²⁷Oni aida ka ba ake tipa awirinyaure ni rengo, ki dari kango geno baga badiaroni?

²⁸“Oni awere, oni bí nga re tie, bambiko ni rengo mi agúmba nga zire ku bangironi te.

²⁹Mi nakpara fu roni, oni káraga tironi, ka oni mángi nga irairapai ya. Oni káraga tironi berewe, gi ngbanga ata nyasa nga te.

³⁰Irairapai du ngbare? Ngbare arengba nga ka ina pa gbegberẽpai, te?