Read zande Eyobo 8 Bible Online

Eyobo 8 - zande bible

Eyobo 8

¹Biridada boro Sua, ki karaga pai ki ya:

²“Mo agúmba agi apai re dati gini rago na agu apai du ngbaro wa bayuge?

³Mbori nairasi ruru sarangbanga? Watadu gu Ko du na tandu apai dũ nasa rurupai ni iraira ha?

⁴Ka awiro aingi kuti ko, ko afu yo ku be tandu gayo samungu.

⁵Ka mo agbáta Mbori sirisiri, ki fu ga kpe zungaditise fu gu Ko du na tandu apai dú;

⁶ka mo du gigiri ni ruru boro, ni rengo ko ni tiko agúari tipa ro, ki fu mosoro kporo foro nga rurupai.

⁷Ka si du wa ga pai adu ni toni he ti tonatona ha, ono digida gamo apai akía ni bakere he.

⁸“Mi nakpara foro, mo sána he tipa agu arago naadu bakuru yo, ki berẽ pa gu pai abarani abi;

⁹bambiko ani tigaani nga kina aboro gba, aina nga pai ya, bambiko gaani arame ri kpotosende wa kina nzereme.

¹⁰I ayúgo nga pai foro, ki gumba pai foro, ki gumba pai kuti sangba kpotoyo, te?

¹¹“Ka badumo sono zanga du ndiwiri ho? Bisimo rengbe ka sona ho adu nga ime ni ya?

¹²Ho si nidu ni ni fogo ho, ka i ata de nga ha ya, si niugu mbata fu gu kura anvuo.

¹³Wo du pa gu pai nga ga agu aboro go bangiriyo ti Mbori; gu maabangirise nga ga zangasinombori si anyása anyasa.

¹⁴Gani ũkida nagberã agberã, gani ukida du wa kina pio ture.

¹⁵Ni amegeda kuti gani bambu, ono si aru nga te; ni azada ha nyanyaki, ono si anye nga te.

¹⁶Ni nangba be kina uru, tereni ki kuru ku rogo gani ati.

¹⁷Tarani kaĩ guguda kirikiri ki da ti ba ambia.

¹⁸Ka i gbarasi ni rogo gu ba ni, si ati kangu ni ati, ki ya, ‘Mi nabi nga ro wa sa te.’

¹⁹Mo ngére, gere nga gene gako ngbarago; ono kura ha akúra sende yo a.

²⁰“Mo ngére, Mbori agindiga nga gu boro zanga pai ku ri ni te, ko azía nga be amangi gbegberẽpai te.

²¹Ono ko ahíisa ngbaro na mongo, na kpotongbaro a na ngbiko ni wawa.

²²Agu yo nasoga ro zee azía yo, ka ga gbegberẽ boro bamburoko adu nga ho berewe ya.”