Read zande Atambuahe 102 Bible Online

Atambuahe 102 - zande bible

Atambuahe 102

¹Ako Yekova, mo gí gi kpetambuahe, ki idi he gi kpe ku ari da koyo du mo ni!

²Ka mo nióko nga kpakpuro ti re rago gi fudifudipai ya! Mo dége turo kono du mi ni; ni gu rago mi ka akpara foro mo káraga pai fere ni ipo!

³Bambiko gimi arame nanyasa wa kina ngime, amemere nagbi wa gburuka we.

⁴Kpotore yo nangbiimi wa kina nvuo, ki ugu; bangire ki go tipa ri gi riahe.

⁵Bambiko gi bakere uko amemere nazia tihe kuti kpotore.

⁶Mi du wa bazire ngbakungba nga perekani, mi ki du wa gbuku bate yo;

⁷mi namaa rago, ki du wa bavurukporo ni sa ru ri bambu yo.

⁸Avurare nagbarasa rimore na uru pitipiti, agu yo nazingisa tiyo ni nzanga kuti re i sa rimore ni ũsengahe.

⁹Bambiko mi ari akuke wa riahe, ki kodi gi mbira ime na aumere,

¹⁰bambiko ga imisiri ngbaduse na ga zinga; mbiko mo atumba re ku ari, ki ba re ku sa yo.

¹¹Gimi arame du wa kina kirima he nagura nyemu; mi nauga wa kina nvuo.

¹²Ako Yekova, ono mo du ni bakindo kindi; tingida pa ro anye ki da ti rika ngbatunga aboro dunduko.

¹³Mo agúari ku ari, nunga Siona ki nimangi ro; ragoho da i ini pai fu he, gu rago i aringbisi he si da.

¹⁴Rago nangba ti gamo amoyambu mbiko gaha ambia; i na nunga fu gaha nvutu.

¹⁵Si du arikaaboro agúnde ti rimo Yekova, na abakindo zegino dunduko ti ga taarimo a.

¹⁶Bambiko Yekova adúa Siona, ko ayúgo tiko rogo gako taarimo;

¹⁷ko agía gu kpetambuahe nga ga aboro ngera vurũ, ko apáyasi nga pa gayo kpetambuahe te.

¹⁸Gi adú re ni keke he fu gu rika ngbatunga aboro nikaye, agu aboro i ata vunga nga yo ya, i atámbua Yekova;

¹⁹bambiko ko angere ri gako kparakpara ziazia ba ku sende no, ngbangbaturũ yo Yekova angere ku auru kpotosende no,

²⁰ka gia gu uko nga ga zizi aboro, ka zaka agu yo i aringbisi yo sa kpio;

²¹ya aboro taki pande rimo Yekova Siona yo, na pa tambua ko Yerusarema yo,

²²ho i ka dungura aboro ni, na angbi sa manga pa Yekova.

²³Ko akati omere bebere he; ko agurusi gimi arame.

²⁴Mi anaya, “Ako gi Mbori, ka mo dí nga re bebere gimi arame ya, mo nga gu ko nye gamo agarã fu rika ngbatunga aboro dunduko!”

²⁵Mo amoi mburu kpotosende bakuru yo, angbangbaturũ nga gu mangapai nga ga bero.

²⁶Si dunduko agó, ono mo nye anye kindi; si akpátaka dunduko wa ramu nakpataka. Mo nasa ha wa ramu, si ki du akia;

²⁷ono mo du wa mo adu mbata, digida garãro ti ni te.

²⁸Awiri gamo amoyambu aráka zezeredi; ngbatungayo adú ni nyakasinyakasi yo ku bara bangiro.