Read zande Atambuahe 103 Bible Online

Atambuahe 103 - zande bible

Atambuahe 103

¹Ako mbisimore, mo sámbua Yekova; agu apare du rogo re yo dunduko, si sámbua kparakpara ziazia rimoko!

²Ako mbisimore, mo sámbua Yekova, ka bangiro nigó nga ti agu ahe dunduko ko anafuka rengbe arengba ya;

³nga gu ko navu ro tipa ga irairaapai dunduko, nahusa gamo awokote dunduko,

⁴natumo ungaro be kere gbarasahe, nakiisa pa ro na weneringise na wene nunga aboro a,

⁵nambisa ro na wene ahe wa du mo ni ungaro, omero ki nidu ni zambuazambua ha wa ga dingimo.

⁶Yekova namanga gu pai ru aru na ruru sarangbanga fu agu yo dunduko i narungosi yo.

⁷Ko nayugu gako agene fu Mose, na gako mangapai fu awiri aYisaraere.

⁸Yekova du na nunga aboro na inapai a, aipo nga na zinga ya, ki du na weneringise kpaima.

⁹Ko azá nga aboro dedede te; ko aká nga kuti gako zinga kindi a te.

¹⁰Ko amanga nga rani kuti gaani ingaapai te, ki fu mosoro fu rani rengbe na gaani irairapai a te.

¹¹Bambiko wa du ngbangbaturũ ku an ri kpotosende, wo du gako weneringise ni nyanyaki he koyo du agu yo ni nagunde ti ko;

¹²wa turũ ku uroyo na dioyo, wo ko naturũsa gaani tiandika ti rani a.

¹³Wa nunga agude namanga abayo, kina wo nunga agu yo namanga Yekova nagunde ti ko.

¹⁴Bambiko ko ini pa bororani; ko natingida pa rani ya nvutu sende nga ani.

¹⁵Ono tipa boro, gani arame du wa kina nvuo; wa mbumbudahe ati yo, kina wo ni naasona;

¹⁶bambiko yuge naya ri he, ka si adu nga ho ya, ka si aina nga baha berewe ya.

¹⁷Ono ga Yekova weneringise du fu agu yo nagunde ti ko mbata rago nikaenga nye anye kindi, na gako rurupai du fu awiri awiriyo a,

¹⁸fu agu yo naka kuti gako mokido, ki nitingidi pa gako andika ka amanga ha.

¹⁹Yekova anyakasi gako mbatabakindo rogo angbangbaturũ yo, gako ngbi nazoga aboro dunduko.

²⁰Oni sámbua Yekova, oni nga gako arimbasa dunduko; agu roni du na nyaka na tandu namanga sangbako, ki nigi woro fugoko!

²¹Oni sámbua Yekova, oni nga gako arimbasa dunduko, nga gako amoyambu namanga gu pai ngba ti ko!

²²Oni sámbua Yekova, oni nga gako mangaapai dunduko, rogo agu arago du fu gako zogarago dunduko. Ako mbisimore, mo sámbua Yekova!