Read zande Atambuahe 104 Bible Online

Atambuahe 104 - zande bible

Atambuahe 104

¹Ako mbisimore, mo sámbua Yekova! Ako Yekova gi Mbori, mo du ni bahe susi! Mo du ni ukadiukadi ro na irisa na bairiwo,

²nga gu ko naukadi tiko na imarago wa roko, nagbaragi angbangbaturũ wa roko dadahe,

³nga gu ko namaa ndu gako abambu ku ime yo; nasa mai ni gako ngbagida, nandu ri pupo yuge,

⁴nasa ayuge ni gamo amokedi, na gamo amoyambu i du wa mirãwe.

⁵Mo namoi amburu kpotosende ka i agbisa nga ha waragoagira ya.

⁶Mo adadi he na dudungura rago wa roko; aime anirundu ku ari ri abaagangara.

⁷Si anioro mbiko ga zapai; ti woro sumba ga gumba si aniipisi tihe ka guari.

⁸Abaagangara ki kuru ku ari, angboongboorago ki nizorõ ku sande ku rogo gu ba mo aringbisi tipa ha.

⁹Mo amoi bangbandarago tipa ha ka si asusa nga ha ya, si du ka si akáraga nga tihe berewe ka mbira kpotosende dunduko ya.

¹⁰Mo nakusa agugaabi ku rogo angboongboorago; si naafuka dagba abaagangara,

¹¹si nafu ime fu anya nvuo dũ; adongi nvuo ki nizeresi gaami gomoro ime na ni.

¹²Azire ari ki du na bambu ra pati he; ami nabi bia rogo abengua.

¹³Rogo ga bambu ku ari mo nakeda mai ku ri abaagangara; kpotosende nahi rengbe be gu zuzu ahe nga ga gamo mangaapai.

¹⁴Mo nasonosa nvuo tipa anya, na kpepasio tipa boro; ya ni kusi riahe sende yo,

¹⁵na ime bakakue si ngiisi kpoto boro yo, na nzeme si hasi kpakpuni, na gu riahe nangarãsa kpoto boro yo.

¹⁶Ga Yekova angua du ni mbimbi he be ime kpaima, nga angua kedara Rebanona yo, gu ko arũku he.

¹⁷Yo azire naadua abambu ra ni; na gonyo du gau bambu rogo angua kupuresa.

¹⁸Gbangagbanga abaagangara du tipa ameme nvuo; ambia du ni bagbuko tipa anya du wa ndakuta.

¹⁹Mo amoi diwi tipa kparaka regbo ahe; uru ini pai tipa gaha rago ti.

²⁰Mo ninambakada bitimo, si ki du nga yuru, anya bire ki nikuru ka ata rogo ho.

²¹Paranga abahu nakpara tipa gaami pasio, ki nigbata gaami riahe be Mbori.

²²Uru nita kura, ami ki niga, ki nipiki rogo gaami asima.

²³Boro nakura sa gani sunge na tipa gani mangapai ki da ku nyemu.

²⁴Ako Yekova, na nge gamo mangaapai! Mo amangi he dunduko na tatamana; kpotosende hi be gamo ũkumuko.

²⁵Yo du baime ni ni bahe na pati he ni bakikii he, yo du agu agbiro ni nagbe tira ni dungu ra, rukutu anya na bakikindigi ra a.

²⁶Abaakurungba naandu ri he, na gu bakere nyaime a, nga gu ru mo ambakadi ru u nita yo.

²⁷Agi ra re dunduko nangera koyo du mo ni, mo fu gaami riahe fu ra ti ragoho.

²⁸Gu he mo nafuka fu ra ami nadungura ha; mo nazara bero, ami ki nimbiki be wene ahe.

²⁹Ho mo nioko kpakpuro ni, ami ki nidu ni fudifudi ra; ho mo nirogo ongara ni, ami ki kpiki ki karaga tira ku rogo nvutu sende.

³⁰Ho mo nakeda ga Toro ni, ami ki du ni mangimangi ra; mo ki nizambuasi kpotosende berewe.

³¹Ga Yekova taarimo nyé anye kindi, Yekova ngí angi rogo gako mangaapai dũ,

³²nga gu ko nangera ku auru kpotosende, si nikio akio, ko nazada abaagangara, ngimihe ki nigundu!

³³Mi abí bia fu Yekova a wa du mi ni ungare; mi abí bia tambuahe fu gi Mbori wa du mi na kpotore ti ni.

³⁴Gi makia pa pai ngbá angba bangiriko, bambiko mi nangi angi rogo Yekova.

³⁵I bá tunga aboro ingapai zegino, ka gbegberẽ aboro dú nga ho berewe ya! Ako mbisimore, mo sámbua Yekova! Oni támbua Yekova!