Read zande Atambuahe 105 Bible Online

Atambuahe 105 - zande bible

Atambuahe 105

¹Ako, oni fú atambuahe fu Yekova, oni kpári ti rimoko, oni yúgu pa gako mangaapai dagba aboro!

²Oni bí bia fu ko, oni bí abia tambuahe fu ko; oni gúmba pa gako iiriwo mangaapai!

³Oni sámbua tironi rogo kparakpara ziazia rimoko; kpoto agu yo yo ningí angi nagbata Yekova!

⁴Oni gbáta Yekova na gako ome, oni gbáta kpakpuko waragoagira!

⁵Oni tíngidi pa gako iiriwo mangaapai nga gu ko amangi, na gako iiriwo yuguyugu apai, na agu asarangbanga naadu ngbako,

⁶Ako, oni nga ngbatunga Abarayama nangia gako moyambu, oni nga awiri Yakoba, nga gako siasia yo!

⁷Ko nga Yekova gaani Mbori; gako asarangbanga du rogo kpotosende dunduko.

⁸Ko atingidi pa gako zungahe nye anye kindi, gu pai ko arugu he fu arika ngbatunga aboro wa kutu sa,

⁹nga gu mokido ko afu fu Abarayama, na gako zungahe fu Yisaka,

¹⁰kina ha ko anyakasi he fu Yakoba tipa rugapai, na fu aYisaraere ni nyenye zungahe,

¹¹niya, “Mi afú ringara Kanana fu roni, ni kparakpara ha ni gaoni.”

¹²Ho i adu ni ni kina bete aboro, ni umba pa yo gbe, ni tata aboro rogo ho;

¹³ki niyara dagba gu rikaaboro na gu rikaaboro, ti gu ngbi ku dagba gu kura aboro,

¹⁴ko aida nga fu boro ni mangi yo gbegberẽ wa sa te; ko aza abakindo tipa yo,

¹⁵niya, “Ka oni zádi nga gimi mbedimbedi yo ya, ka oni mángi nga gimi anebi gbigbita a ya!”

¹⁶Ho ko ayambu gberãngbi ni si ti ku ri ringara a, ki nika na ngbatunga riahe be yo dunduko,

¹⁷ko akedi kumba ku mbata yo fu yo, nangia Yosefa i abagi ko ni kanga.

¹⁸Nduko aimi be angboro, i avo gorõko ni azogbo marã;

¹⁹daho rago gu pai ko agumba pa ha ada ni; sangba Yekova aasadi ko.

²⁰Bakindo akedi pai ki kusi ko, boro kina bazogo aboro ki idi he ko kuru;

²¹ko asa ko ni gako buruku ku ri gako kporo, ni bazogo gako aũkporo dunduko,

²²ko vodi gako awiri abazogo a wa ko akpi nyemu he, ki niyugu tatamana fu gako abaakumba.

²³Si du Yisaraere aye ti ni ku Ezipeta yo; Yakoba ki sungu ringara Ama yo.

²⁴Yekova angeesi gako aboro gbe, ki ninyakasi yo susi agu yo naafuda yo.

²⁵Ko asa kpoto afudi yo yo i sogo gako aboro, i mangi gako amoyambu ni birĩ.

²⁶Ko akedi Mose nangia gako moyambu, na Arona nangia gu ko ko asia ko.

²⁷I ayugu gako yuguyuguapai ku dagba yo, na gako iiriwo yuguyuguapai rogo ringara Ama.

²⁸Ko akedi bitimo, rago ki biri, ka i asa nga mungu kuti gako apai ya.

²⁹Ko asa gayo aime ni kure, ki imi gayo atĩo.

³⁰Gayo ringara ki hi ahi be rimbasa adari, na rogo ga gayo abakindo abambu a.

³¹Ko agumba pai, awangu azii ki kuru, na azari dati kina bangbanda gayo arago.

³²Ko afu morogumba fu yo ku ba mai, na rerere mirãwe ku rogo gayo ringara.

³³Ko agbarasi gayo agiri kakue na gayo angua vurumo a, ki kuadi angua bangbanda gayo rago.

³⁴Ko agumba pai, ayere ki kuru, na abakirigba, ka i arengba nga na geda ra ya;

³⁵ami ki riti kpepasio rogo gayo ringara dunduko, ki riti zuzu ũ gayo sende.

³⁶Ko aimi bambata avungu rogo gayo ringara dunduko a, nangia tonatona gayo ome dunduko.

³⁷Ko akusi aYisaraere na feda na dahabu be yo a, rurungbura boro adu nga dagba ngbatungayo wa sa te.

³⁸AEzipeto angi ho i aguari ni, bambiko gunde yo ati ku ri yo.

³⁹Ko agbaragi dubo ni ũdadahe, na we si hasi rago yuru.

⁴⁰I asana he, ko ki fu ambirigbo, ko anambisa yo na riahe ngbangbaturũ.

⁴¹Ko asari mbia, ime ki gbadi kpua; si afu wa di ku rogo ugu rago.

⁴²Bambiko ko atingidi pa gako kparakpara ziazia kidohe, na pa Abarayama nangia gako moyambu.

⁴³Wo ko akusi gako aboro na wasa, gako siasia aboro na bibia.

⁴⁴Ko ki fu agu aringara nga ga arikaaboro fu yo; i anaroga ga aboro aũsunge ni gayo,

⁴⁵ya i ka kuti gako rugaapai, ki nimangi pa gako arugute. Oni támbua Yekova!