Read zande Atambuahe 106 Bible Online

Atambuahe 106 - zande bible

Atambuahe 106

¹Oni támbua Yekova! Ako, oni fú atambuahe fu Yekova, bambiko ko du ni wene ko; gako weneringise nye anye kindi!

²Da rengbe ka gumba pa ga Yekova kangarã mangaapai, watadu ka yugo pa tambua ko dunduko a?

³Aboro maku nga agu yo naka kuti manga pa ruru sarangbanga, namanga rurupai ti arago dunduko!

⁴Ako Yekova, mo tíngidi pa re, ni gu ngbanya du ti ro fu gamo aboro; ako, mo yé na ga bata fere;

⁵ya mi bi gu wenepia nga ga gamo siasia yo, mi ningi mbiko gu ngbarago nga ga gamo rikaaboro, mi nisambua tire na gamo aboro.

⁶Ani amongo ingi pai wa sa na abarani, ani amangi irairapai, ani amangi pai ni gbegberẽ he.

⁷Abarani aberã nga pa gamo iiriwo apai wa i adu Ezipeta yo te; i atingida nga pa ga weneringise wa nge he ange te, ono i asa mungu pati baime, nga Zamba Baime.

⁸Ono wa si avura du wo, ko abatasi yo mbiko rimoko, ka yugo pa gako kangarã tandu fu aboro i ini pa ha.

⁹Ko aza Zamba Baime a, si ki ugu; si du ko angbe ku mbata yo fu yo ti ni rogo dudungura arago, wa ka si du rogo ngbakungba.

¹⁰Si du ko abatasi yo be gu ni naasoga yo, ki batasi yo be ome iravura.

¹¹Aime ki dadi agu yo nafudi yo; a nga gu ni sa nanye te.

¹²I ki idi pa gako apai; i abi abia tambua ko.

¹³Ono bangiriyo ago ti gako mangaapai ni ipo; i asunguda nga sangbako te.

¹⁴Ono i akpi nyemu gbegberẽ ahe ngbakungba yo gbe, ki asadi Mbori kpatakpari yo;

¹⁵ko afu gu he i asana he tipa ha, ono ko akedi kaza gbarasa kpoto ku dagba yo.

¹⁶Ho i akpi pai ni kuti Mose rogo bataya, na kuti Arona nangia ga Yekova kparakpara ziazia ko a,

¹⁷kpotosende asari ki mbiri Datana, ki dadi ga Abirama rikaaboro.

¹⁸We ki kuru ku dagba rikayo; mirãwe ki nizokodi gbegberẽ aboro.

¹⁹1 ambakadi wiri bagara Orebe yo, ki irisi zaragasizaragasi sese kpiahe.

²⁰Si du i asa ga Mbori taarimo ni kpia babagara nga gu ru nari nvuo.

²¹Bangiriyo ago ti Mbori nga gayo Batasi, naamanga bakere apai Ezipeta yo,

²²na iiriwo mangaapai rogo ringara Ama, na kigikigi apai ti ngba Zamba Baime a.

²³Si du ko aya ti ni ko nikagbarasa yo― ka Mose aru nga ku bara bangiriko ni azarõ nga gako siasia boro, ka sa gako erã ya, ka ko agbarasi yo agbarasa.

²⁴I ki payasi pa gu wene ringara, i aida nga pa gako kidohe te.

²⁵I akpakana kina he rogo gayo abamburoko, i agia nga sangba Yekova te.

²⁶Si du ko atumba beko ti ni ki zunga he, ya ko asika yo i tiwi ngbakungba yo,

²⁷ko abáfa ngbatungayo ku dagba arikaaboro, ki gbandaka yo ku rogo aringara.

²⁸I akpamia tiyo na Bara-peoro, ki niri gu he i atumo na ni fu akangba;

²⁹were i azingisi Yekova, ko zingi be gayo mangaapai, ngbongi ki ti ku dagba yo.

³⁰Finasa ki ru ku ari, ki du wa azarõ, si du ngbongi ki nyasi.

³¹I ki gedi gure ni rurupai fu ko, dati gu rika ngbatunga aboro na gu kura rika ngbatunga aboro kindi.

³²I azingisi gako erã pati aime Meriba, si du pai angba nga ti ni fu Mose tipa gayo pai ya;

³³bambiko i azingisi toroko, si du ko agumba pai ti ni ni gba sa pai.

³⁴I agbarasa nga rika aboro, wa Yekova arugu yo tipa ha te,

³⁵ono i akodi tiyo na arikaaboro, ki wiriki pa gayo mangaapai.

³⁶I amanga pa gayo kpiaahe, nga gu naye ka du ni gbina fu yo.

³⁷I atumo na awiriyo nga akumba fu adaimona na awiriyo nga ade a;

³⁸ki niuka kure wenesa, nga kure awiriyo nga akumba na awiriyo nga ade a, nga agu yo i atumo na yo fu ga Kanana kpiaahe; ringara ki du ni birikosibirikosi he be kure.

³⁹Were i ametasi tiyo na gayo mangaapai, ki nimangi pai ni sino pa bari rogo gayo mangaapai.

⁴⁰Si du ga Yekova zinga arungudi ti ni kuti gako aboro, ko ki sogo gako siasia yo;

⁴¹ko ki fu yo ku be arikaaboro, agu yo naasoga yo i ki nizogo yo.

⁴²Avurayo arungosi yo a, i adu ni zogozogo yo ku tii be yo.

⁴³Ko anabatasa yo ti dungu rago, ono i anasa mungu rogo gayo berã pa apai, ko ki umbasi pa yo tipa gayo irairapai.

⁴⁴Ono wa si avura du wo ko aberẽ pa gayo fudifudipai, ho ko agi pa gayo yambahe ni.

⁴⁵Ko atingidi pa gako mokido fu yo, ki sa gako berã ku sangba gako weneringise yo wa nge he ange.

⁴⁶Ko ambakadi pai tipa yo ya nunga yo mangi agu yo naazia yo ni zizi yo.

⁴⁷Ako Yekova gaani Mbori, mo bátasi rani, ki dungura rani dagba arikaaboro, ya ani fu atambuahe fu kparakpara ziazia rimoro, ka dia bese rogo tambua ro.

⁴⁸Yekova dú ni sambuasambua ko, nga ga aYisaraere Mbori, mbata rago nikaenga nye anye kindi! Aboro dunduko yá, “Amina!” Oni támbua Yekova.