Read zande Atambuahe 107 Bible Online

Atambuahe 107 - zande bible

Atambuahe 107

¹Ako, oni fú atambuahe fu Yekova, bambiko ko du ni wene ko; gako weneringise nye anye kindi!

²Agu yo Yekova atumo yo i nipéke he wo, nga agu yo ko atumo yo be irafudifudipai;

³ki dungura yo rogo aringara, uroyo na dioyo, nodiyo na sudiyo a.

⁴Agu yo amerẽ ku ngbakungba yo, yo gene adu nga ni ya, i abi nga bakporo ka i araka yo te;

⁵gomoro amangi yo na gomoro ime a, he anamaka mbísimoyo amaka rogo yo yo.

⁶I ki poi ku ari fu Yekova rogo gayo fudifudipai, ko ki batasi yo be gayo dungbapai;

⁷ko ki ningbe ku mbata yo fu yo ngba ruru gene a, daho i ada ni ku rogo bakporo ka araka yo.

⁸Ako, si du ka aboro atámbua Yekova ti ni tipa gako weneringise, na tipa gako iiriwo mangaapai fu awiri aboro!

⁹Bambiko ko nambisa mbisimo gu ni du na zingo ahe, ki mbisi mbisimo gu ni du na gomoro na wene ahe.

¹⁰Agu yo naasunga rogo bitimo na rogo kirima kpio, du ni vodivodi yo be gberãngbi na marã,

¹¹bambiko i asa mungu kuti ga Mbori apai, ki payasi sangba gu Ko nga Bahe ki susi.

¹²Si du ko aumbasi kpotoyo yo ti ni na nyanyaki sunge; i atiwi ku sande, boro adu nga ho ka unda yo wa sa te.

¹³I ki poi ku ari fu Yekova rogo gayo fudifudipai, ko ki batasi yo be gayo dungbapai;

¹⁴ko akusi yo bitimo yo na rogo kirima kpio, ki nikafu gayo agire akafa kpakpa.

¹⁵Ako, si du ka aboro atámbua Yekova ti ni tipa gako weneringise, na tipa gako iiriwo mangaapai fu awiri aboro!

¹⁶Bambiko ko nakuadi angbadimo sirigi, ki niyepe rogo angbongbo marã kpakpa.

¹⁷Agu airapupo adu ni rungosirungosi yo mbiko gayo tiandika, na tipa gayo irairaapai a;

¹⁸mbisimoyo asogo ngbatunga riahe dunduko, i ki nimbedi na angbadimo kpio.

¹⁹I ki poi ku ari fu Yekova rogo gayo fudifudipai, ko ki batasi yo be gayo dungbapai;

²⁰ko akedi gako pai ki husi yo, ki nibatasi yo be gbarasa pai.

²¹Ako, si du ka aboro atámbua Yekova ti ni tipa gako weneringise, na tipa gako iiriwo mangaapai fu awiri aboro!

²²I túmo ni amotumo tambuahe, ki taki pande pa gako mangaapai nibi bia ngbarago!

²³Agu yo naandu ku baime yo rogo abaakurungba, naamanga sunge ri bakere aime;

²⁴agi yo re abi ga Yekova mangaapai, na gako iiriwo apai rogo dudungura rago.

²⁵Bambiko ko arugu pai, ki kusi yuge bazigizo, natumba ngambiringambiri ngiri aime ku ari.

²⁶I ki ndu ku ari yo, ki nizorõ berewe ku dudungura arago yo; mbisimoyo arungbura be gu gbigbitapai namanga yo;

²⁷i ki nindu nzaunzau ku bani na ku bani, wa akpibuda, si ki gasi gayo berã.

²⁸I ki poi ku ari fu Yekova rogo gayo fudifudipai, ko ki kusi yo be gayo dungbapai;

²⁹ko aza yuge bazigizo, si ru zaa, ngambiringambiri ngiri aime ki tidi.

³⁰I ki ningi angi wa du yo zezeredi, ko ki ye na yo ku rogo gu gbuduru i akpi nyemu ka ndu ku rogo.

³¹Ako, si du ka aboro atámbua Yekova ti ni tipa gako weneringise, na tipa gako iiriwo mangaapai fu awiri aboro!

³²I kíisi pa ko akiisa dagba rimbasa agu aboro nga ga aboro yo, ki nitambua ko rogo ga abaakumba barondo a.

³³Ko ninasa adi ni ngbakungba, na gugaabi ni ngbi gomoro ime,

³⁴na gu ringara nazuga azuga gbe ni kpatakpari tikpo, bambiko gu gbigbitapai nga ga agu yo naraka yo.

³⁵Ko nasa ngbakungba ni amunga ime, na ugu sende ni aime gugaabi a.

³⁶Ko naida ha fu agu yo gomoro namanga yo i raki yo, ya i mbakadi bakporo rengbe ka araka rogo;

³⁷ki niurugu aũati, ki rũku bakakue ati, ki bi gu zuzuahe nazuka yo.

³⁸Ko nafu maku fu yo a, si du nge yo ange ti ni kpaima; ko aida nga pa gayo zogozogo anya ami runa a te.

³⁹Ho i naruna ni berewe, ki paya, bambiko rungosi, na gbigbitapai, na rungo a,

⁴⁰ko nabafa ũpayasi ku ri abarumbatayo, ki merẽsi yo ku ngbakungba yo, yo gene adu nga ni ya;

⁴¹ono ko natumba airazingo ahe ku ari rago gberãngbi, ki sa rika ngbatungayo wa rimbasa anya.

⁴²Ruru aboro abi he, ki ningi angi; irairapai ki kisi ngbaha dunduko.

⁴³Agu yo du na tatamana ti yo, i ágía agi apai re, ki makia pa ga Yekova weneringise.