Read zande Atambuahe 109 Bible Online

Atambuahe 109 - zande bible

Atambuahe 109

¹Ako Mbori, nga ga gi tambuahe, ka mo nióngo nga kii ya!

²Bambiko ngba gbegberẽ boro naza kuti re na ngba irabiriki a, i nagumba pai ni mirãyo kuti re ni zire.

³I nake pati re kirikiri nigumba apai ni sogote a, ki niso vura na mi zanga ndupai.

⁴I nga abakitingbangare tipa gi nyemuse, ono mi nafu tire sa kpetambuahe tipa yo.

⁵I nafu gbigbitapai fere ku ba wenepai, na sogote tipa gi nyemuse.

⁶Mo mói gbegberẽ boro kuti ni; ki idi he bakitingbanga ru ku kumbabeni.

⁷Ho i ka sapa ngbanga ni ni, i sápu he asapa kuti ni; i gedi gani kpetambuahe wa ingapai!

⁸Gani arame dú adu ni kina umba ha; kura boro rogó gani ahe!

⁹Awirini dú ni awirinyaure, diani ki du ni dekurugbo!

¹⁰Awirini dú ni yarayara aboro ni aoahe; i gbáta gayo riahe rogo gayo abate!

¹¹Irabape zí agu ahe du be ni dunduko; akare gbú aũ gani sunge dunduko!

¹²Ka boro dú nga ho ka dogoda na weneringise fu ni wa sa ya, ka boro dú nga ho ka ina pai fu gani awirinyaure wa sa a ya

¹³I gbándaka tungani ku sa yo; i gbándaka rimoni dagba gu ue rika ngbatunga nikaye!

¹⁴I tíngidi pa ga atitani irairapai ku bangiri Yekova, ka i gbándaka nga ga nani ingapai a ya!

¹⁵I dú ku bara bangiri Yekova kindi; ko gbándaka tingida pa yo zegino!

¹⁶Bambiko ni atingida nga pa yugo weneringise te, ono ni narungosi rungorungo boro na irazingoahe, ka imo agu yo kpotoyo yo awo awo.

¹⁷Ni akpi nyemu tiwa he; motiwa yé kina ku ri ni! Ngba nga maku fu ni te; si túrú aturã ti ni!

¹⁸Ni aukadi tini na motiwa wa roko, si rími ku vuni yo wa ime, wa nzeme ku rogo amemeni yo!

¹⁹Si dú fu ni wa gu roko ni nadada tini na ni, wa gu gire ni navoda dimoni na ni dedede!

²⁰Gere dú ni ga abakitingbangare mosoro be Yekova, na ga agu yo nagumba gbigbitapai kuti ungare!

²¹Ako Mbori gi Gbia, ono mo mángi pai fere mbiko rimoro; mo bátasi re mbiko ga weneringise du ni wene he!

²²Bambiko mi du ni rungorungo re na zingo ahe a, kpotore yo ho ku rogo re yo.

²³Mi nasusa wa kirima he nagura nyemu; mi du ni yaya re ku ari na ku sande wa kina yere.

²⁴Arukusure rungbura be gina riahe; borore du ngorõkia.

²⁵Mi du wa úgbarasarimo fu abakitingbangare; ho i nibi re ni, i ki niwo ti riyo.

²⁶Ako Yekova, gi Mbori, mo únda re! Ako mo bátasi re wa du pa ga weneringise!

²⁷I íni ya bero du; Ako Yekova, mo namangi he!

²⁸I tiwa he atiwa, ono mo fú maku! Ho i ka guari ni, zee amánga yo, ono ga moyambu angi angi

²⁹I úkadi abakitingbangare ni wasiro; i dádi yo na gayo zee wa baukadi!

³⁰Mi afú bakere atambuahe fu Yekova ni ngbare, mi atámbua ko dagba rimbasa aboro.

³¹Bambiko ko naru ku kumbabe irazingoahe, ka batasa ni be agu yo nasapa ngbanga ni sa kpio.