Read zande Atambuahe 116 Bible Online

Atambuahe 116 - zande bible

Atambuahe 116

¹Mi nakpi nyemu Yekova, bambiko ko anagia fugore na gimi azungaditise.

²Bambiko ko adege tuko kono du mi ni, si du mi akpára ti ni fu ko kindi wa du mi ni ungare.

³Agiri kpio avo gbu pati re kirikiri, ga Baatoro kpikpi aboro dungbapai azi re a; mi ki nibi fudifudipai na rungo.

⁴Mi ki nikpari ti rimo Yekova: “Ako Yekova, mi nazungadi ro, mo bátasi mbisimore!”

⁵Yekova du na inapai, ni ruru ko; gani Mbori du na nunga aboro.

⁶Yekova nabanda azanga inahe; ho pai adi ni be re ki susi, ko abatasi re.

⁷Ako mbisimore, mo káraga tiro ku rogo ga ba zereda; bambiko Yekova amangi foro wenengaĩ gbe.

⁸Bambiko mo abatasi mbisimore be kpio, na bangire be aume, na ndure be kotoka;

⁹mi nata ku bara bangiri Yekova rogo ringara unga aboro.

¹⁰Mi naka kuti gi idapase, zavura ho mi aya ni, “Mi du ni rungosirungosi re gbe”;

¹¹mi ki ya ni gi tuka pai, “Aboro dunduko nga airazire.”

¹²Gini he mi ka fu fu Yekova tipa gu gako weneapai dunduko fu ko fere?

¹³Mi atúmba inga bata, ki kpari ti rimo Yekova,

¹⁴mi amánga pa gimi azungahe fu Yekova, ku bara bangiri gako aboro dunduko.

¹⁵Pa kpio ga Yekova ziazia aboro du ni kikiipa he bangiriko.

¹⁶Ako Yekova, mi nga ga moyambu ni rengo; mi nga ga moyambu, nga wiri gu ga kanga nga de. Mo azaki agu agire naavodi re.

¹⁷Mi atúmo ni motumo tambuahe foro, ki nikpari ti rimo Yekova.

¹⁸Mi amánga pa gimi azungahe fu Yekova, ku bara bangiri gako aboro dunduko,

¹⁹rogo agu avurukporo nga ga ga Yekova bambu, Ako Yerusarema, rogo ro yo. Oni támbua Yekova!