Read zande Atambuahe 118 Bible Online

Atambuahe 118 - zande bible

Atambuahe 118

¹Ako, oni fú atambuahe fu Yekova, bambiko ko du ni wene ko; bambiko gako weneringise nye anye kindi!

²Yisaraere yá awere, “Gako weneringise nye anye kindi.”

³Ngbatunga Arona yá awere, “Gako weneringise nye anye kindi.”

⁴Agu yo nagunde ti Yekova i yá awere, “Gako weneringise nye anye kindi.”

⁵Mi akpari fu Yekova rogo gi dungbapai; Yekova akaraga pai fere ki moi re ku rogo bakere rago.

⁶Wa du Yekova tipa re; mi agunde nga wa sa te. Gini pai boro ka manga re na ni?

⁷Wa du Yekova tipa re dagba agu yo naunda re; si du mi abi diasima ku ri agu yo nasoga re.

⁸Futise ku be Yekova ngba ki susi maa berã ti boro.

⁹Futise ku be Yekova ngba ki susi maa berã ti abarumbatayo.

¹⁰Rikaaboro dunduko ake pati re, ono mi gbarasi yo ti rimo Yekova!

¹¹I ake pati re; i ake pati re kirikiri; ono mi gbarasi yo ti rimo Yekova!

¹²I ake pati re wa nyege; i bisi yo wa rindi kiwe we yo; mi gbarasi yo ti rimo Yekova!

¹³1 aturã re nyanyaki ya mi ti, ono Yekova aunda re.

¹⁴Yekova nga gi ome nga gi bia; ko aye ka du ni gi bata.

¹⁵Oni gí woro bia bata du rogo ga ruru aboro abamburoko yo; “Kumbabe Yekova namanga apai na ngarã,

¹⁶kumbabe Yekova du ni kiisikiisi pa ha, kumbabe Yekova namanga apai na ngarã!”

¹⁷Mi akpí nga te, mi anyé anye ni ungare, ki taki pande pa ga Yekova mangaapai.

¹⁸Yekova arugu re nyanyaki, ono ko afu nga re fu kpio te.

¹⁹Mo zá angbadimo rurupai fere, mi rimi koyo ka fu atambuahe fu Yekova.

²⁰Gere nga ga Yekova ngbadimo; ruru aboro aríma yo.

²¹Mi fu tambuahe foro, bambiko mo akaraga pai fere, ki ye ka du ni gi bata.

²²Gu mbia abaduabambu nigindiga ha kina ha du ni mbia tukpu he ri he.

²³Gi pai re Yekova amangi he; si ki iriwo airiwo bangirani.

²⁴Gere nga gu uru Yekova afu; ani dú pusiapusia ki ningi angi rogo ho.

²⁵Ako Yekova, mo bátasi rani awere, ani nazungadi ro! Ako Yekova, ani nazungadi ro, mo kédi wenepia fu rani awere!

²⁶Boro maku nga gu ni naye ti rimo Yekova! Ani sámbua roni tii ga Yekova bambu yo.

²⁷Yekova nga Mbori, ko fu imarago fu rani. Oni vódi ũmotumo na agire kuti agu agbanga du ti bamotumo!

²⁸Mo nga gi Mbori, mi afú atambuahe foro; mo nga gi Mbori, mi akíisa pa ro.

²⁹Ako, oni fú atambuahe fu Yekova, bambiko ko du ni wene ko; gako weneringise nye anye kindi!