Read zande Atambuahe 119 Bible Online

Atambuahe 119 - zande bible

Atambuahe 119

¹Aboro maku nga agu yo du gayo apai ziazia, nata rogo ga Yekova rugute!

²Aboro maku nga agu yo naka kuti gako adezirepai, ninagbata ko na kpotoyo yo dũ,

³nga agu yo amanga nga irairapai wa sa ya, ono i nata kina rogo gako apai.

⁴Mo arugu rani na gamo andika, ya ani nika kuti ni nzunzu.

⁵Ako, ka gimi apai nidu ni nyakasinyakasi he ya mi ka kuti gamo rugaapai!

⁶Si du zee amánga nga re ti ni ya, ho mi ka uda sangbaro ni dunduko.

⁷Mi afú atambuahe foro na ruru kpotore yo, ho mi ka ina pa gamo ruru asarangbanga ni.

⁸Mi abérã pa gamo rugaapai; Ako, ka mo mbú nga re wa sa ya!

⁹Waĩ ka paranga boro girisi gani pai? Ni makia pai kuti fugoro.

¹⁰Mi nagbata ro na kpotore yo dunduko; ako, ka mo ídi nga mi mere be sangbaro ya!

¹¹Mi naiga ga pai ku kpotore yo, ya ka mi niingi nga pai kuti ro ya.

¹²Ako Yekova, i sámbua ro; mo rába re na gamo rugaapai!

¹³Mi nataka pande pa agu asarangbanga du ngbaro dunduko, ni ngbare.

¹⁴Mi nangi ngba gene gamo adezirepai, a wa mi nangi tipa ũkumuko dunduko.

¹⁵Mi abáka bangire tipa gamo andika, ki udi gamo apai.

¹⁶Gi ngbarago adú rogo gamo rugaapai; bangire agó nga ti ga pai te.

¹⁷Mo mángi pa ga moyambu kpaima, mi ki nye ni ungare, ki niberẽ pa ga pai.

¹⁸Mo zá bangire mi bi iiriwo apai rogo ga rugute.

¹⁹Mi nga nungunungu boro ku zegino; ka mo nióko nga sangbaro ti re ya!

²⁰Mbisimore nafaa be nyemu gamo asarangbanga du kuti ni dedede.

²¹Mo ninaza airaenda du ni aboro motiwa, namefa be sangbaro;

²²mo rógo gayo gbarasarimo ti re na payasi pa re, bambiko wa ka mi kuti gamo adezirepai.

²³Ka awiri abazogo vura sunga nita bura re vurũ; ga moyambu abáka bangirini tipa kina gamo rugaapai.

²⁴Gamo adezirepai du ni gi pa ngbarago, nga gimi abororondo a.

²⁵Mbisimore nadika tihe kuti nvutu sende; mo úngasi re ku sangba ga pai yo!

²⁶Ho mi ataki pande pa gimi apai ni, mo akaraga pai fere; mo rába re na gamo rugaapai!

²⁷Mo rúgu re mi ini pa gamo andika, si du mi abáka bangire tipa gamo iiriwo mangaapai.

²⁸Mbisimore nazirã be rõrõi berã; mo nyákasi re ku sangba ga pai yo!

²⁹Mo dí pa zire ti re tuturu; ki fu kina ga rugute fere ni weneringiro!

³⁰Mi sia pa yososopai, mi amoi gamo asarangbanga ku bara bangire.

³¹Ako Yekova, mi nazia tire kuti gamo adezirepai; ka mo nibá nga zee ku ri re ya!

³²Mi aóra ngba gene sangbaro, ho mo ka kiisa gi rugatinapai ni!

³³Ako Yekova, mo rába re na gamo rugaapai; si du mi aká kuti ni daho rago ka diga ni.

³⁴Mo fú rugatinapai fere, si mi ka ka kuti ga rugute ti ni; ki berẽ pa ha na kpotore yo dunduko.

³⁵Mo gási re ngba gene sangbaro; bambiko gi ngbarago du rogo ho.

³⁶Mo rúgu kpotore yo tipa gamo adezirepai; sa mokiisa biriki te!

³⁷Mo dí bangire ti ngera kuti pa wia; ki ungasi re rogo gamo apai.

³⁸Mo nyákasi ga pai fu ga moyambu nagunde ti ro.

³⁹Mo dí gi gbarasarimo tire nga gu mi nagunde be he; bambiko gamo asarangbanga du ni wene he.

⁴⁰Mo ngére, mi nafaa be nyemu gamo andika; mo úngasi re wa du mo ni irarengo!

⁴¹Ako Yekova, mo ídi he ga weneringise ye fere, nga ga bata, ku sangba ga pai yo.

⁴²Si du mi adú na pai ka karaga ha fu agu yo napayasi re, bambiko mi nakida kuti ga pai.

⁴³Ka mo dí nga gu pai nga ga rengo ngbare wa sa ya, bambiko wa moi mi bangire kuti gamo asarangbanga.

⁴⁴Mi naka aka kuti ga rugute nye anye kindi;

⁴⁵mi atá wa boro ra ni rini, bambiko wa mi agbata gamo andika.

⁴⁶Mi agúmba pa gamo adezirepai ku bara bangiri abakindo a, ka zee amánga nga re ya;

⁴⁷bambiko mi bi pa gi ngbarago rogo sangbaro nga gu mi nakpi nyemu he.

⁴⁸Mi natumba bere ku ari kuti sangbaro nga gu mi nakpi nyemu he; mi abáka bangire tipa gamo rugaapai.

⁴⁹Mo tíngidi pa gu pai mo agumba ha fu ga moyambu, nga gu mi amoi bangire kuti ni mbiko ro.

⁵⁰Gere nga gi pa wasa rogo gi gberãngbi ya ga pai aungasi re.

⁵¹Airaenda awia re awia gbe, ono mi asa nga tire ti ga rugute te.

⁵²Ako Yekova, ho mi naberã pa gamo asarangbanga ni naadu bakuru mi ki bi wasa.

⁵³Fafoi zinga azi re gbe, tipa gu gbegberẽ aboro nagindiga ga rugute.

⁵⁴Gamo rugaapai adu ni pa gimi abia rogo bambu yo ngba gi nunguro.

⁵⁵Ako Yekova, mi natingida pa rimoro yuru, ki ka kuti ga rugute.

⁵⁶Gi adu fere re, bambiko mi aka kuti gamo andika.

⁵⁷Yekova nga gi ũkumuko; mi aya mi aká kuti gamo apai.

⁵⁸Mi nazungadi pa ga wene ngbanya na kpotore yo dunduko; mo ini pai fere ku sangba ga pai yo.

⁵⁹Ho mi naberã pa gamo apai ni, mi naaria ndure sa gamo adezirepai;

⁶⁰mi naipisa tire, mi aima nga te ka ka kuti sangbaro.

⁶¹Ka ga gbegberẽ aboro agire vura voda re vurũ, bangire ago nga tipa ga rugute te.

⁶²Mi naguari bebere yuru ka fu tambuahe foro, tipa pa gamo ruru asarangbanga.

⁶³Mi nga badia ngbanya na agu yo dunduko nagunde ti ro, nga agu yo naka kuti gamo andika.

⁶⁴Ako Yekova, kpotosende hiki be ga weneringise; mo rába re na gamo rugaapai.

⁶⁵Ako Yekova, mo amangi pai fu ga moyambu wenengaĩ, ku sangba ga pai yo.

⁶⁶Mo rába re na wene sarangbanga na inahe, bambiko wa idi mi sangbaro.

⁶⁷Mbata fu rungosi re mi amerẽ ku bani; ono awere mi naka kuti ga pai.

⁶⁸Mo du ni wene ro, mo namanga wenepai; mo rába re na gamo rugaapai.

⁶⁹Airaenda are azire kuti re; ono mi naka kuti gamo andika na kpotore yo dunduko

⁷⁰kpotoyo yo du ni bakere he wa si na nzeme; ono gi ngbarago du rogo ga rugute.

⁷¹Si ni wenepai fere wa mi adu ni rungosirungosi re; mi wiriki gamo rugaapai be he.

⁷²Gu rugute nakura ngbaro yo si ni wene he fere ki susi marã dahabu wa akutu na ga feda a.

⁷³Bero afu re ki mbakadi re a; mo fú rugatinapai fere, mi wiriki sangbaro.

⁷⁴Agu yo nagunde ti ro i abí re ki ngi angi, bambiko mi moi bangire ti ga pai.

⁷⁵Ako Yekova, mi ini he ya gamo asarangbanga du ni ruru mo arungosi re na ga yososopai.

⁷⁶Mi nazungadi ro, ga weneringise nidú ni gi pa wasa, ku sangba ga pai yo fu ga moyambu.

⁷⁷Mo ídi he ga wene nunga ye fere, mi ki du ni ungare; bambiko ga rugute nga gi pa ngbarago.

⁷⁸Zee zi airaenda azia, bambiko i amangi re ni biriki; ono mi ni tire abáka bangire tipa gamo andika.

⁷⁹Agu yo ninagunde ti ro i sá tiyo kono du mi ni, ka ina gamo adezirepai.

⁸⁰Ako, ka kpotore yo dú ziazia be gamo rugaapai, si du ka zee amanga nga re ti ni ya!

⁸¹He namaka mbisimore tipa ga bata; ono mi namaa bangire ti ga pai.

⁸²Bangire nambu be sunguda pa ga kidohe; mi nasana he, “Mo angárãsa re ni gini rago?”

⁸³Bambiko mi du wa mangu ime rogo ngime, ono bangire ago nga ti gamo rugaapai te.

⁸⁴Arame ga moyambu adú waĩ? Mo asápa ngbanga agu yo narungosi re ni gini rago?

⁸⁵Airaenda ageteke adue tipa re, nga agu yo amanga nga sangba ga rugute ya.

⁸⁶Sangbaro dunduko du ni kina ku rengo; i narungosi re ni wia; mo únda re!

⁸⁷I ambedi ka nyasa re zegino; ono mi ambu nga pa gamo andika te.

⁸⁸Mo bátasi re ku sangba ga weneringise yo; si du mi ka ka kuti gamo adezirepai ti ni du ngbaro.

⁸⁹Ako Yekova, ga pai dũ ni nyakasinyakasi he ku angbangbaturũ yo nye anye kindi.

⁹⁰Ga yososopai du fu arika ngbatunga aboro dunduko; mo anyakasi kpotosende, si ki ru aru kindi.

⁹¹Si nye da ku areme mbiko mo naaringbisi he; bambiko ahe dunduko du ni ga gamo amoyambu.

⁹²Ka si du wa ga rugute adu nga ni gi ngbarago te, ka mi aima kpi rago gi gberãngbi.

⁹³Bangire ago nga ti gamo andika waragoagira te; bambiko mo aungasi re na ni.

⁹⁴Mi nga gamo ni, mo bátasi re; bambiko mi nagbata gamo andika.

⁹⁵Gbegberẽ aboro nasunguda re ka gbarasa re; ono mi naberã pa gamo adezirepai.

⁹⁶Mi abi digida ziazia apai dunduko; ono sangbaro adu nga na ngbanda ha ti ni ya.

⁹⁷Ako, nyemu ga rugute namanga re amanga ni rengo! Si nga gu mi nabaka bangire tipa ha na uru pitipiti.

⁹⁸Sangbaro nasa re ni iratatamana susi avurare, bambiko si du na mi dedede.

⁹⁹Mi du na rugatinapai susi gimi abayugupai dunduko, bambiko wa mi nabaka bangire tipa gamo adezirepai.

¹⁰⁰Mi rugu tire na pai susi gbinza aboro, bambiko wa mi naka kuti gamo andika.

¹⁰¹Mi di ndure ti gene gbigbitapai dunduko, ya mi nibérẽ kina ga pai.

¹⁰²Mi aguari nga pati gamo asarangbanga te, bambiko mo araba re.

¹⁰³Na nziri gamo apai ngbare yo! Ii, si nzinziri susi nzeme anyege ngbare yo!

¹⁰⁴Mi nidu na rugatinapai be gamo andika; si du sogo mi irairapai ti ni dunduko.

¹⁰⁵Ga pai wa baro tipa ndure, nga imarago ngba gi gene.

¹⁰⁶Mi azunga he, ki digisi pa ha, ya mi abérã pa gamo ruru asarangbanga.

¹⁰⁷Mi du ni rungosirungosi re gbe; Ako Yekova, mo úngasi re ku sangba ga pai yo!

¹⁰⁸Ako Yekova, mi nazungadi ro, mo ídi pa gimi agamunihe nga tambuahe, ki raba re na gamo asarangbanga.

¹⁰⁹Mbisimore ngba pai dedede, ono bangire ata go nga ti ga rugute te.

¹¹⁰Gbegberẽ aboro are gbina tipa re, ono mi ainga nga ti gamo andika te.

¹¹¹Gamo adezirepai du wa ũkumbo nye anye kindi; ii, si nga ga kpotore yo pa wasa.

¹¹²Mi naruga kpotore yo ka manga pa gamo rugaapai, nye anye kindi, ii, daho rago ka diga ni.

¹¹³Mi nasoga agu yo du na berã ue, ono mi nakpi nyemu ga rugute.

¹¹⁴Mo nga gi bagbuko nga gi vurakube; mi moi bangire ti ga pai.

¹¹⁵Oni gúari ti re, oni nga amangi gbigbitapai, mi ka kuti sangba gi Mbori.

¹¹⁶Mo sóngodi re ku sangba ga pai yo, mi nye ni ungare, ka zee mángi nga re mbiko gi maabangirise ya.

¹¹⁷Mo sóngodi re, mi sungu zezeredi, ki niberẽ pa gamo rugaapai dedede!

¹¹⁸Mo nagindiga agu yo dunduko naainga ti gamo rugaapai, ii, bambiko gayo birĩ nga kungba pai gbua.

¹¹⁹Mo nageda gbegberẽ aboro kpotosende no dunduko wa kina mirĩ marã; si du mi nakpi nyemu gamo adezirepai ti ni.

¹²⁰Borore nakiga be gunde ro, mi nagunde be gamo asarangbanga.

¹²¹Mi amangi agu apai ru aru du ni rengo a; ka mo mbú nga re fu abarungosire ya.

¹²²Mo du ku ba ga moyambu tipa wenepai; ka mo niídi nga airaenda rungosi re ya.

¹²³Bangire nambu be sunguda pa ga bata, na tipa digisa pa ga ruru kidohe.

¹²⁴Mo mángi pai fu ga moyambu ku sangba ga weneringise yo, ki raba re na gamo rugaapai.

¹²⁵Mi nga ga moyambu; mo fú rugatinapai fere, ya mi ini gamo adezirepai!

¹²⁶Yekova ragoho da mo mangi pai, bambiko i asa ga rugute ni kungba he.

¹²⁷Si du rai nakpi nyemu sangbaro ki susi dahabu, ii, susi ziazia dahabu.

¹²⁸Si du mi nauda gamo andika dunduko ya si ru aru tipa apai dunduko; mi ki sogo irairaapai dunduko.

¹²⁹Gamo adezirepai du ni banaru pai; si du mbisimore naka kuti ni.

¹³⁰Be r ma gamo apai ku kpoto yo si nafu imarago; si nafu rugatinapai fu azangainahe.

¹³¹Mi aka ngbare ha, ki niongo zorokozoroko, bambiko gomoro sangbaro namanga re.

¹³²Mo ária tiro kono du mi ni, ki ini pai fere, a wa du sinoro fu agu yo nakpi nyemu rimoro.

¹³³Mo rúgu ndure ku rogo ga pai, ka irairapai zógo nga re wa sa ya.

¹³⁴Mo bátasi re be gu rungosi nga ga boro, si du mi ka ka kuti gamo andika ti ni.

¹³⁵Mo ídi he kpakpuro hasi rago ku ri ga moyambu, ki raba re na gamo rugaapai.

¹³⁶Bangire naga na aume wa ime wiriadi, bambiko aboro aka nga kuti ga rugute te.

¹³⁷Ako Yekova, mo du ni ruru ro, gamo asarangbanga du ni ruru he.

¹³⁸Mo aringbisi pa gamo adezirepai ni rurupai ni boro yososopai dunduko.

¹³⁹Nyemuro narika re arika, bambiko bangiri agu yo nafuda re go ti gamo apai.

¹⁴⁰Gu pai dũ ni ziazia ha gbe, si du ga moyambu nakpi nyemu he ti ni.

¹⁴¹Mi du ni umba boro ni payasipayasi re, ono bangire ago nga ti gamo andika te.

¹⁴²Ga rurupai du ni nyenye rurupai, ga rugute nga rengo.

¹⁴³Fudifudipai azi re na imisiripai, ono sangbaro du ni gi pa ngbarago.

¹⁴⁴Gamo adezirepai du ni ruru he nye anye kindi; mo fú rugatinapai fere, mi ki nye ni ungare.

¹⁴⁵Ako Yekova, mi nakpara foro na kpotore yo dunduko; mo káraga pai fere! Mi aká kuti gamo rugaapai.

¹⁴⁶Mi nakpara foro, mo bátasi re, ya mi nibérẽ pa gamo adezirepai.

¹⁴⁷Mi nazinga mbata fu ngbatutu, ki nikpari ku ari; mi namaa bangire ti gamo apai.

¹⁴⁸Bangire du ni haha ha ti arago maarago yuru, ya mi nibákí bangire tipa ga pai.

¹⁴⁹Mo gí fugore ku sangba ga weneringise yo; Ako Yekova, mo úngasi re ku sangba ga ruru asarangbanga yo.

¹⁵⁰Agu yo napeka fuo gbegberẽpai i nambeda; i ki turũ ti ga rugute.

¹⁵¹Ako Yekova, ono mo du mbembedi, sangbaro dunduko nga kina ku rengo.

¹⁵²Tipa gamo adezirepai mi aima ina pa ha bakuru yo, ya mo aringbisi pa ha nye anye kindi,

¹⁵³Mo bi nga gi gberãngbi, ki batasi re, bambiko bangire ago nga ti ga rugute te.

¹⁵⁴Mo du pati re na gi ngbanga, ki tumo re; mo úngasi re ku sangba ga pai yo!

¹⁵⁵Bata du tuturũ ti gbegberẽ aboro, bambiko wa i agbata nga gamo rugaapai ya.

¹⁵⁶Ako Yekova, gamo wene nunga du ni badungu he; mo úngasi re ku sangba ga ruru sarangbanga yo.

¹⁵⁷Agu yo narungosi re i ni dungu yo na agu yo nafuda re a, ono mi aaria nga tire ti gamo adezirepai te.

¹⁵⁸Mi abi airabiriki ki sogo yo, bambiko wa i aberã nga pa ga pai ya.

¹⁵⁹Mo bérẽ nga pa waĩ mi nakpi nyemu gamo andika! Mo bánda ungare, ku sangba ga weneringise yo.

¹⁶⁰Gamo apai nga kina ku rengo dunduko; gamo ruru asarangbanga dunduko nye anye kindi.

¹⁶¹Awiri abazogo narungosi re zanga ndupai, ono kpotore yo ru nagunde ti gamo apai.

¹⁶²Mi nangi tipa ga pai wa gu ni nabi wene aĩtgbuahe.

¹⁶³Mi sogo pa zire ki payasi he, ono mi nakpi nyemu kina ga rugute.

¹⁶⁴Mi natambua ro bara saba na uru tipa gamo ruru asarangbanga.

¹⁶⁵Bakere zereda du fu agu yo nakpi nyemu ga rugute; he adu nga ho sa ka kotosi yo te.

¹⁶⁶Ako Yekova, mi namaa bangire tipa ga bata, ki nimangi sangbaro.

¹⁶⁷Mbisimore naka kuti gamo adezirepai; mi nakpi nyemu he gbe.

¹⁶⁸Mi naka kuti gamo andika na gamo adezirepai, bambiko gimi apai du ku bara bangiro dunduko.

¹⁶⁹Ako Yekova, mo ídi he gi yambahe ye ku bara bangiro; mo fú rugatinapai fere ku sangba ga pai yo!

¹⁷⁰Mo ídi he gi zungaditise ye ku bara bangiro; mo bátasi re ku sangba ga pai yo.

¹⁷¹Ngbare apéka pa tambuahe, bambiko mo ninaraba re na gamo rugaapai.

¹⁷²Mirãre abi bia pa ga pai, bambiko sangbaro dunduko du ni ruru he.

¹⁷³Mo mbákadi bero ka unda re, bambiko wa sia mi gamo andika.

¹⁷⁴Ako Yekova, mi nafaa be nyemu ga bata, ga rugute nga gi pa ngbarago.

¹⁷⁵Mo ídi he mbisimore dú ni ungaha mi ki tambua ro, gamo asarangbanga únda re.

¹⁷⁶Mi amerẽ ku bani wa ingiingi kandoro; mo gbáta ga moyambu, bambiko bangire ago nga ti sangbaro te.