Read zande Atambuahe 132 Bible Online

Atambuahe 132 - zande bible

Atambuahe 132

¹Ako Yekova, mo tíngidi pa Dawidi, na pa gako rungosi dunduko;

²wa ko azunga he fu Yekova ki kido he fu gu Ko du na tandu apai dú nga ga Yakoba ko,

³“Ni rengo, mi aríma nga ku rogo gi bambu te; mi adákpa nga ku auru gi barame a te;

⁴mi aída nga pa rame fu bangire te, puku bangire akísa nga a te,

⁵daho mi ka bi ba ni tipa Yekova, nga banye tipa gu Ko du na tandu apai du nga ga Yakoba ko.”

⁶Oni ngére, ani agi pa ha Efurata yo, ani ki bi he birengua yo.

⁷“Ani ndú ku rogo gako banye; ani írisi ko pati gbada nduko!”

⁸Ako Yekova, mo gúari ki ndu ku rogo ga baongoda, mo na gu sanduki nga ga ga ome.

⁹I úkadi gamo aboromotumo ni rurupai; gamo ziazia aboro ki ningbiko ni ngbarago.

¹⁰Bambiko pa gu vururo nga Dawidi ka mo ária nga kpakpu ga mbedimbedi boro ya.

¹¹Yekova azunga he fu Dawidi ni rengo, ka ko asá nga tiko ti ni ya; “Mi amáa kina wiro ku ri ga mbatabakindo.

¹²Ka awiro ka kuti gi mokido na gimi adezirepai nga gu mi ka yugo ho fu yo, awiriyo asúnga ku auru ga mbatabakindo a nye anye kindi.”

¹³Bambiko Yekova asia Siona; ko akpi nyemu he tipa gako banye;

¹⁴“Gere nga gi baongoda nye anye kindi; ho mi ka nye ni, bambiko mi nakpi nyemu he.

¹⁵Mi afú maku kpaima ku ri gaha ariahe; mi ambísa gaha airazingohe na riahe.

¹⁶Gaha aboromotumo mi aúkadi yo na bata, gaha ziazia aboro angbíko ku ari na ngbarago.

¹⁷Yo mi ka fu ome ni fu Dawidi si moi pai; bambiko mi aasia pa we tara tipa gi mbedimbedi boro.

¹⁸Mi abá zee ku ri avurako, ono gako kpakpari bakindo adú ni taataa ha ku riko yo.”