Read zande Atambuahe 135 Bible Online

Atambuahe 135 - zande bible

Atambuahe 135

¹Oni támbua Yekova, Oni támbua rimo Yekova, Ako agu roni nga avuru Yekova, oni támbua ko,

²nga agu roni rundu rogo ga Yekova bambu, rogo avurukporo pati ga gaani Mbori bambu!

³Oni támbua Yekova, bambiko Yekova du ni wene ko; oni bí bia atambuahe ti rimoko, bambiko ko du ni wene ko!

⁴Bambiko Yekova asia Yakoba ni gako ko, na Yisaraere ko du ni gako ũkumuko.

⁵Bambiko mi ini he ya Yekova nga bahe, gaani Gbia du ku ri ambori dunduko.

⁶Gu ngba ti Yekova, kina ha mangi ko ho, ngbangbaturũ yo na kpotosende no, rogo abaime na rogo dudungura arago dunduko a.

⁷Ko ninafu nduro si nigundu ku ari digida kpotosende no, ko ninamanga aikpira gumba si nifu mai; ko ninakusa yuge rogo gako baigaahe.

⁸Ko nga gu ko naimi bambata avungu Ezipeta yo, nga ga awiri aboro na ga anya a;

⁹Ako Ezipeta, ko nakedi gako yuguyuguapai na iiriwo yuguyuguapai a ku dagba roni, ku ri Faro, na avuruko dunduko;

¹⁰naimi rikaaboro ni dungu yo, ki imi nyanyaki abakindo,

¹¹Siona nangia bakindo aAmoro, na Ogo nangia bakindo Basana, na agu angbi du Kanana yo dunduko,

¹²ko ki fu gayo ringara ni ukumbo, ni ũkumbo fu aYisaraere nga gako aboro.

¹³Ako Yekova, rimoro nye anye kindi, Ako Yekova, worimoro nye kindi fu rika ngbatunga aboro dunduko.

¹⁴Bambiko Yekova asápa ngbanga fu gako aboro, nunga avuruko amánga ko.

¹⁵Agu akpiaahe nga ga arikaaboro du ni feda na dahabu, nga ũsabe aboro.

¹⁶Ngbaha ti ni, ono si naafura nga te, abangirise ti ni, ono si naabi nga he te,

¹⁷atuhe ti ni, ono si naagia nga pai na ni te, onga ngbaha yo a te.

¹⁸Agu yo namanga ha i dú wa kina ha!― ii, na agu yo dunduko nakida kuti ni a!

¹⁹Ako ngbatunga aYisaraere, oni sámbua Yekova! Ako ngbatunga Arona, oni sámbua Yekova!

²⁰Ako ngbatunga Revi, oni sámbua Yekova! Agu roni nagunde ti Yekova, oni sámbua Yekova!

²¹Sambuahe dú fu Yekova Siona yo, nga gu ko nanye Yerusarema yo! Oni támbua Yekova!