Read zande Atambuahe 139 Bible Online

Atambuahe 139 - zande bible

Atambuahe 139

¹Ako Yekova, mo awisigi pa re, ki ini re!

²Mo ini pa gi sunga na gimi ru ku ari; mo rugu tiro na pa gi berã wa du mo tuturũ.

³Mo nawisiga pa gi gene na gi pika sande, ki ini gimi apai dunduko.

⁴Ako Yekova, mo ngére, mbata fu gumba mi pai ni mirãre, mo niima ina ha dunduko.

⁵Mo akisi rago ku giire yo na ku barangba re yo a, ki moi bero ti re.

⁶Inahe wa gure si nagasa re agasa; si susi re, mi arengba nga na ni te.

⁷Wari ka mi ndu ku ho ni be ga Toro? Wari ka mi oro ku ho ni bara bangiro?

⁸Ka mi dakpa ku ngbangbaturũ yo, mo kina yo! Ka mi mbakadi gi barame Baatoro kpikpi aboro yo, mo ngére, mo kina yo!

⁹Ka mi nindu ri apupo wiso, ki ninye ti digida baime yo,

¹⁰bero agbe re kina yo, kumbabero ki zadi re.

¹¹Ka mi ya, “Kina bitimo dadi re, gu imarago du pati re dú wa yuru,”

¹²bitimo naaoka nga re be ro te, yuru naha wa kina uru; bambiko bitimo na imarago si wa kina sa bangiro.

¹³Bambiko mo amangi aũ vureyo, mo naazungure rukumbu nina yo.

¹⁴Mi nafu atambuahe foro, bambiko mo ambakadi re na iiriwo banaru pai. Iiriwo ahe nga gamo mangaapai! Mo naina pa re nzunzu wenengaĩ;

¹⁵kpotore adu nga ni okooko ho ti ro te, ho i amangi re ni rogo gbuko, ki mbakadi re ni iiriwo pai rogo gu dudungura arago nga ga kpotosende.

¹⁶Bangiro abi kpotore wa si adu ni iwo ho; i ake pa apare dunduko ku rogo ga kitabu, na agu arago i ambakadi re tipa ha, mbata ho apare adu nga ni wa ka si du ya.

¹⁷Ako Mbori, ga berã pa re nga gu kikiipahe bangire! na nge pa geda ha a!

¹⁸Ka mi ageda ha, si ange ki susi ngume. Ho mi nazinga ni be rame ani na kina ro kindi.

¹⁹Ako Mbori, ka mo imi gbegberẽ aboro ni rengo, ka agu yo guari ti re nga abaimiaboro,

²⁰nga agu yo nabasa sangbaro gbegberẽ, nayamba rimoro ni wia!

²¹Ako Yekova, ati mi naasoga agu yo nasoga ro asoga? Ati mi naapayasi pa agu yo namo kuti ro?

²²Mi nasoga yo ni ndikidi sogote; mi nageda yo wa avurare.

²³Ako Mbori, mo wísigi pa re, ki ini pa kpotore yo! Mo ásadi re, ki ini gimi berã pa apai!

²⁴Mo ki bi he, si ngia gene gbegberẽpai rogo re yo, ki ngbe ku mbata yo fere ngba nyenye gene!