Read zande Atambuahe 140 Bible Online

Atambuahe 140 - zande bible

Atambuahe 140

¹Ako Yekova, mo bátasi re be gbigbita aboro; mo nibánda re be airazuu,

²nga agu yo naberã pa gbigbitaapai ku kpotoyo yo, ki nizingisi pa vura dedede.

³I tĩisi mirãyo wa ga wo, gu kere sure nga ga awo si du vuru kpotongbayo yo.

⁴Ako Yekova, mo bánda re be gbegberẽ aboro; mo nibánda re be airazuu, nga agu yo naberã pa kama ndure.

⁵Airaenda are gbina tipa re, i agbaragi agire wa pio, i areke angindi pangba gene tipa re a.

⁶Mi naya fu Yekova, Mo nga gi Mbori; Ako Yekova, mo dége turo sa gimi akpesarawati!

⁷Ako Yekova, nga gi Gbia, nga nyanyaki batasire, mo adadi rire rago vura.

⁸Ako Yekova, ka mo niídi nga pa gu nyemuhe nga ga gbegberẽ boro ya; ki mbakadi gani gbigbita berã a ya.

⁹Agu yo ke pati re kirikiri tumba riyo ku ari, mo niídi he gayo sawia ngbayo yo di be kina yo!

¹⁰Kina kingiriwe tíwi ku auru yo! I báfu yo ku rogo adue we yo, ka i akura nga yo berewe ya!

¹¹Ka i nyákasi nga pa gu boro nasoa pai gbigbita rogo ringara ya; gbigbitapai gbáta irazuu ka ba ni ku sande ni ipo!

¹²Mi ini he ya Yekova nambakada pa gu ngbanga nga ga gu ni i narungosi ni, ki sari ngbanga ni ruru he fu airazingoahe a.

¹³Ni rengo ruru aboro afú atambuahe fu rimoro; agu aboro du ni ruru yo anyé bara bangiro.