Read zande Atambuahe 143 Bible Online

Atambuahe 143 - zande bible

Atambuahe 143

¹Ako Yekova, mo gí gi kpetambuahe; mo yé turo sa gimi akpesarawati! Mo káraga pai fere ni ga yososopai na ga rurupai a!

²Ka mo nindú nga sa sapangbanga na ga moyambu ya; bambiko a nga unga boro sa zanga pai ku ri ni ku bangiro te.

³Bambiko iravura arungosi re; ko anari ungare ku sande; ko aya mi sungu kina rogo bitimo, wa agu yo naima kpika bakuru yo.

⁴Si du he amaka torore ti ni rogo re yo; kpotore yo ki du wa kina bate.

⁵Mi natingida pa agu arago naadu bakuru yo, mi namakia pa ga sunge dunduko; mi nabaka bangire tipa gu mangapai nga ga bero.

⁶Mi nataã bere koyo du mo ni; mbisimore na gomoro ime tipa ro, wa katuka ringara.

⁷Ako Yekova, mo ípisi tiro ka karaga pai fere! Torore nanyasa! Ka mo nióko nga kpakpuro ti re ya, mi ka du wa agu yo nazorã ku Due yo.

⁸Mo ídi he mi nigí pa ga weneringise na awiso, bambiko mi nakida kuti ro. Mo yúgu gu gene fere mi ka andu ngba ha, bambiko mi natumba mbisimore koyo du mo ni.

⁹Ako Yekova, mo bátasi re be avurare! Mi naora koyo du mo ni mo oko re!

¹⁰Mo rába re mi mangi gu pai ngba ti ro, bambiko mo nga gi Mbori! Mo niídi he ga wene toro ngbe fere ku mbata yo ngba kpasakpasa gene!

¹¹Ako Yekova, mo úngasi re mbiko rimoro! Mo kúsi re be fudifudipai mbiko ga rurupai!

¹²Mo rógo avurare ku sa yo ni ga weneringise, ki gbarasi agu yo dunduko nafuda re, bambiko mi nga ga moyambu.