Read zande Atambuahe 144 Bible Online

Atambuahe 144 - zande bible

Atambuahe 144

¹Yekova dú ni sambuasambua ko nga gi mbia, nayugo pa sovura fu abere, na pa ta kpata fu awirinzagare;

²nga gi weneringise, nga gi gbata, nga gi sosono kirikiri gbata nga batasire, nga gi vurakube, nga gu ko fu mi tire ku be ko, nga gu ko nasa gimi aboro i ra fere.

³Ako Yekova, gini he nga boro mo nangera koyo du ni ni, na wiri boro, mo aberã pa ni?

⁴Boro wa kina uturangba, gani arame wa kirima naasusa.

⁵Ako Yekova, mo núga angbangbaturũ, ki zorõ kono! Mo zádi abaagangara si nigundu!

⁶Mo bá ikpira gumba, si ki ki gbandaka yo yasika, mo báfu gamo asiida, ki gbarasi yo!

⁷Mo táĩ bero ari yo kono, mo bátasi re, ki kusi re rogo badungu aime, na be awiri kungba aboro,

⁸nga agu yo ngbayo nafura ni wia, kumbabeyo du ni kumbabe zire.

⁹Ako Mbori, mi abí vovo bia foro; mi abí bia atambuahe foro na gu kindondo du na giriru bawe,

¹⁰mo nga gu ko nafu diabese fu abakindo, nabatasi Dawidi nga ga moyambu.

¹¹Mo bátasi re be kere basape, ki kusi re be awiri kungba aboro, nga agu yo ngbayo nafura ni wia, kumbabeyo du ni kumbabe zire.

¹²Ako, ka awirani nga akumba nidú wa tomaahe asona rago parangayo, awirani nga ade nidú wa sekeseke ambia tukpu bambu rengbe na ga bakindo bambu;

¹³gaani agbamu nihí rengbe na angbatunga ariahe; gaani akandoro nibátika banambu yo wa akutu na akutu bawe a;

¹⁴gaani zogozogo anya nidú na awira, bakuadirago nidú nga te; pa zia aboro a te; tawawa nidú nga ngba gaani agene a te!

¹⁵Rago nangba ti agu aboro du ngbatunga pai fu yo wa gere! Rago nangba ti agu aboro du gayo Mbori nga Yekova!